کچھ اس ادا سے آج وہ پہلو نشیں رہے — جگر مراد آبادی
شاعر
کچھ اس ادا سے آج وہ پہلو نشیں رہے
کچھ اس ادا سے آج وہ پہلو نشیں رہے
جب تک ہمارے پاس رہے ہم نہیں رہے
ایمان و کفر اور نہ دنیا و دیں رہے
اے عشق شاد باش کہ تنہا ہمیں رہے
عالم جب ایک حال پہ قائم نہیں رہے
کیا خاک اعتبار نگاہ یقیں رہے
میری زباں پہ شکوہ درد آفریں رہے
شاید مرے حواس ٹھکانے نہیں رہے
جب تک الٰہی جسم میں جان حزیں رہے
نظریں مری جوان رہیں دل حسیں رہے
یارب کسی کے راز محبت کی خیر ہو
دست جنوں رہے نہ رہے آستیں رہے
تا چند جوش عشق میں دل کی حفاظتیں
میری بلا سے اب وہ جنونی کہیں رہے
جا اور کوئی ضبط کی دنیا تلاش کر
اے عشق ہم تو اب ترے قابل نہیں رہے
مجھ کو نہیں قبول دو عالم کی وسعتیں
قسمت میں کوئے یار کی دو گز زمیں رہے
اے عشق نالہ کش تری غیرت کو کیا ہوا
ہے ہے عرق عرق وہ تن نازنیں رہے
درد و غم فراق کے یہ سخت مرحلے
حیراں ہوں میں کہ پھر بھی تم اتنے حسیں رہے
اللہ رے چشم یار کی معجز بیانیاں
ہر اک کو ہے گماں کہ مخاطب ہمیں رہے
ظالم اٹھا تو پردۂ وہم و گمان و فکر
کیا سامنے وہ مرحلہ ہائے یقیں رہے
ذات و صفات حسن کا عالم نظر میں ہے
محدود سجدہ کیا مرا ذوق جبیں رہے
کس درد سے کسی نے کہا آج بزم میں
اچھا یہ ہے وہ ننگ محبت یہیں رہے
سر دادگان عشق و محبت کی کیا کمی
قاتل کی تیغ تیز خدا کی زمیں رہے
اس عشق کی تلافئ مافات دیکھنا
رونے کی حسرتیں ہیں جب آنسو نہیں رہے
Kuchh is adā se aaj vo pahlū-nashīñ rahe
Kuchh is adā se aaj vo pahlū-nashīñ rahe
Jab tak hamāre paas rahe ham nahīñ rahe
Īmān o kufr aur na duniyā o dīñ rahe
Ai ishq shād bāsh ki tanhā hamīñ rahe
Ālam jab ek haal pe qā.im nahīñ rahe
Kyā ḳhāk e'tibār-e-nigāh-e-yaqīñ rahe
Merī zabāñ pe shikva-e-dard-āfrīñ rahe
Shāyad mere havās Thikāne nahīñ rahe
Jab tak ilāhī jism meñ jāñ-e-hazīñ rahe
Nazreñ mirī jawāñ raheñ dil hasīñ rahe
Yārab kisī ke rāz-e-mohabbat kī ḳhair ho
Dast-e-junūñ rahe na rahe āstīñ rahe
Tā chand josh-e-ishq meñ dil kī hifāzateñ
Merī balā se ab vo junūnī kahīñ rahe
Jā aur koī zabt kī duniyā talāsh kar
Ai ishq ham to ab tire qābil nahīñ rahe
Mujh ko nahīñ qabūl do ālam kī wus'ateñ
Qismat meñ kū-e-yār kī do gaz zamīñ rahe
Ai ishq nāla-kash tirī ghairat ko kyā huā
Hā.e hā.e araq araq vo tan-e-nāznīñ rahe
Dard o ġham-e-firāq ke ye saḳht marhale
Hairāñ hūñ maiñ ki phir bhī tum itne hasīñ rahe
Allāh re chashm-e-yār kī mo'jiz-bayāniyāñ
Har ek ko hai gumāñ ki muḳhātib hamīñ rahe
Zālim uThā to parda-e-wahm o gumāñ o fikr
Kyā sāmne vo marhala-hā-e-yaqīñ rahe
Zāt o sifāt-e-husn kā ālam nazar meñ hai
Mahdūd sajda kyā mirā zauq-e-jabīñ rahe
Kis dard se kisī ne kahā aaj bazm meñ
Achchhā ye hai vo nañg-e-mohabbat yahīñ rahe
Sar-dādagān-e-ishq o mohabbat kī kyā kamī
Qātil kī teġh-e-tez ḳhudā kī zamīñ rahe
Is ishq kī talāfī-e-mā-fāt dekhnā
Roñe kī hasrateñ haiñ jab āñsū nahīñ rahe
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں