شاعر فطرت ہوں جب بھی فکر فرماتا ہوں میں — جگر مراد آبادی
شاعر
شاعر فطرت ہوں جب بھی فکر فرماتا ہوں میں
شاعر فطرت ہوں جب بھی فکر فرماتا ہوں میں
روح بن کر ذرے ذرے میں سما جاتا ہوں میں
آ کہ تجھ بن اس طرح اے دوست گھبراتا ہوں میں
جیسے ہر شے میں کسی شے کی کمی پاتا ہوں میں
جس قدر افسانۂ ہستی کو دہراتا ہوں میں
اور بھی بیگانۂ ہستی ہوا جاتا ہوں میں
جب مکان و لا مکاں سب سے گزر جاتا ہوں میں
اللہ اللہ تجھ کو خود اپنی جگہ پاتا ہوں میں
تیری صورت کا جو آئینہ اسے پاتا ہوں میں
اپنے دل پر آپ کیا کیا ناز فرماتا ہوں میں
یک بہ یک گھبرا کے جتنی دور ہٹ آتا ہوں میں
اور بھی اس شوخ کو نزدیک تر پاتا ہوں میں
میری ہستی شوق پیہم میری فطرت اضطراب
کوئی منزل ہو مگر گزرا چلا جاتا ہوں میں
ہائے ری مجبوریاں ترک محبت کے لیے
مجھ کو سمجھاتے ہیں وہ اور ان کو سمجھاتا ہوں میں
میری ہمت دیکھنا میری طبیعت دیکھنا
جو سلجھ جاتی ہے گتھی پھر سے الجھاتا ہوں میں
حسن کو کیا دشمنی ہے عشق کو کیا بیر ہے
اپنے ہی قدموں کی خود ہی ٹھوکریں کھاتا ہوں میں
تیری محفل تیرے جلوے پھر تقاضا کیا ضرور
لے اٹھا جاتا ہوں ظالم لے چلا جاتا ہوں میں
تا کجا یہ پردہ داری ہائے عشق و لاف حسن
ہاں سنبھل جائیں دو عالم ہوش میں آتا ہوں میں
میری خاطر اب وہ تکلیف تجلی کیوں کریں
اپنی گرد شوق میں خود ہی چھپا جاتا ہوں میں
دل مجسم شعر و نغمہ وہ سراپا رنگ و بو
کیا فضائیں ہیں کہ جن میں حل ہوا جاتا ہوں میں
تا کجا ضبط محبت تا کجا درد فراق
رحم کر مجھ پر کہ تیرا راز کہلاتا ہوں میں
واہ رے شوق شہادت کوئے قاتل کی طرف
گنگناتا رقص کرتا جھومتا جاتا ہوں میں
یا وہ صورت خود جہان رنگ و بو محکوم تھا
یا یہ عالم اپنے سائے سے دبا جاتا ہوں میں
دیکھنا اس عشق کی یہ طرفہ کاری دیکھنا
وہ جفا کرتے ہیں مجھ پر اور شرماتا ہوں میں
ایک دل ہے اور طوفان حوادث اے جگرؔ
ایک شیشہ ہے کہ ہر پتھر سے ٹکراتا ہوں میں
Shair-e-fitrat hun jab bhi fikr farmata hun main
Rooh ban kar zarre zarre mein sama jata hun main
Aa ke tujh bin is tarah aye dost ghabrata hun main
Jaise har shai mein kisi shai ki kami paata hun main
Jis qadar afsana-e-hasti ko dohrata hun main
Aur bhi begana-e-hasti hua jata hun main
Jab makan-o-la-makaan sab se guzar jata hun main
Allah Allah tujh ko khud apni jagah paata hun main
Teri soorat ka jo aaina use paata hun main
Apne dil par aap kya kya naaz farmata hun main
Yak ba yak ghabra ke jitni door hat aata hun main
Aur bhi us shokh ko nazdeek-tar paata hun main
Meri hasti shauq-e-paiham meri fitrat iztirab
Koi manzil ho magar guzra chala jata hun main
Haaye re majbooriyan tark-e-mohabbat ke liye
Mujh ko samjhate hain woh aur un ko samjhata hun main
Meri himmat dekhna meri tabiyat dekhna
Jo sulajh jaati hai guthi phir se uljhata hun main
Husn ko kya dushmani hai ishq ko kya bair hai
Apne hi qadmon ki khud hi thokarein khata hun main
Teri mehfil tere jalwe phir taqaza kya zaroor
Le utha jata hun zaalim le chala jata hun main
Ta kaja yeh parda-dari haaye ishq-o-laaf-e-husn
Haan sambhal jayein do alam hosh mein aata hun main
Meri khaatir ab woh takleef-e-tajalli kyun karein
Apni gard-e-shauq mein khud hi chhupa jata hun main
Dil mujassam sher-o-naghma woh sarapa rang-o-boo
Kya fazayein hain ke jin mein hal hua jata hun main
Ta kaja zabt-e-mohabbat ta kaja dard-e-firaq
Rehm kar mujh par ke tera raaz kehlata hun main
Wah re shauq-e-shahadat kuu-e-qaatil ki taraf
Gungunata raqs karta jhoomta jata hun main
Ya woh soorat khud jahan-e-rang-o-boo mehkoom tha
Ya yeh alam apne saaye se daba jata hun main
Dekhna is ishq ki yeh tarfa kaari dekhna
Woh jafa karte hain mujh par aur sharmata hun main
Ek dil hai aur toofan-e-hawadis aye Jigar!
Ek sheesha hai ke har patthar se takrata hun main
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں