اس کی نظروں میں انتخاب ہوا — جگر مراد آبادی
شاعر
اس کی نظروں میں انتخاب ہوا
اس کی نظروں میں انتخاب ہوا
دل عجب حسن سے خراب ہوا
عشق کا سحر کامیاب ہوا
میں ترا تو مرا جواب ہوا
ہر نفس موج اضطراب ہوا
زندگی کیا ہوئی عذاب ہوا
جذبۂ شوق کامیاب ہوا
آج مجھ سے انہیں حجاب ہوا
میں بنوں کس لیے نہ مست شراب
کیوں مجسم کوئی شباب ہوا
نگۂ ناز لے خبر ورنہ
درد محبوب اضطراب ہوا
میری بربادیاں درست مگر
تو بتا کیا تجھے ثواب ہوا
عین قربت بھی عین فرقت بھی
ہائے وہ قطرہ جو حباب ہوا
مستیاں ہر طرف ہیں آوارہ
کون غارت گر شراب ہوا
دل کو چھونا نہ اے نسیم کرم
اب یہ دل روکش حباب ہوا
عشق بے امتیاز کے ہاتھوں
حسن خود بھی شکست یاب ہوا
جب وہ آئے تو پیشتر سب سے
میری آنکھوں کو اذن خواب ہوا
دل کی ہر چیز جگمگا اٹھی
آج شاید وہ بے نقاب ہوا
دور ہنگامۂ نشاط نہ پوچھ
اب وہ سب کچھ خیال و خواب ہوا
تو نے جس اشک پر نظر ڈالی
جوش کھا کر وہی شراب ہوا
ستم خاص یار کی ہے قسم
کرم یار بے حساب ہوا
Uski nazron mein intikhab hua
Dil ajab husn se kharab hua
Ishq ka sehar kamyab hua
Main tera to mera jawab hua
Har nafas mauj-e-iztirab hua
Zindagi kya hui azaab hua
Jazba-e-shauq kamyab hua
Aaj mujh se unhein hijaab hua
Main banun kis liye na mast-e-sharab
Kyun mujassam koi shabab hua
Nigah-e-naaz le khabar varna
Dard-e-mehboob iztirab hua
Meri barbadiyan durust magar
Tu bata kya tujhe sawab hua
Ain-e-qurbat bhi ain-e-furqat bhi
Haaye woh qatra jo habab hua
Mastiyan har taraf hain aawara
Kaun gharat-gar-e-sharab hua
Dil ko chhoona na aye naseem-e-karam
Ab yeh dil rukash-e-habab hua
Ishq be-imteyaz ke haathon
Husn khud bhi shikast-yaab hua
Jab woh aaye to peshtar sab se
Meri aankhon ko izn-e-khwab hua
Dil ki har cheez jagmaga uthi
Aaj shayad woh be-naqaab hua
Daur-e-hungama-e-nishat na pooch
Ab woh sab kuch khayal-o-khwab hua
Tune jis ashk par nazar daali
Josh kha kar wahi sharab hua
Sitam-e-khaas-e-yaar ki hai qasam
Karam-e-yaar be-hisab hua
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں