اے موت انہیں بھلائے زمانے گزر گئے — خمار بارہ بنکوی
شاعر
اے موت انہیں بھلائے زمانے گزر گئے
اے موت انہیں بھلائے زمانے گزر گئے
آ جا کہ زہر کھائے زمانے گزر گئے
او جانے والے آ کہ ترے انتظار میں
رستے کو گھر بنائے زمانے گزر گئے
غم ہے نہ اب خوشی ہے نہ امید ہے نہ یاس
سب سے نجات پائے زمانے گزر گئے
کیا لائق ستم بھی نہیں اب میں دوستو
پتھر بھی گھر میں آئے زمانے گزر گئے
جان بہار پھول نہیں آدمی ہوں میں
آ جا کہ مسکرائے زمانے گزر گئے
کیا کیا توقعات تھیں آہوں سے اے خمارؔ
یہ تیر بھی چلائے زمانے گزر گئے
Aye maut unhein bhulaye zamaane guzar gaye
Aye maut unhein bhulaye zamaane guzar gaye
Aa ja ke zeher khaye zamaane guzar gaye
O jaane wale aa ke tere intezaar mein
Raste ko ghar banaye zamaane guzar gaye
Gham hai na ab khushi hai na ummeed hai na yaas
Sab se nijaat paaye zamaane guzar gaye
Kya laiq-e-sitam bhi nahin ab main dosto
Patthar bhi ghar mein aaye zamaane guzar gaye
Jaan-e-bahar phool nahin aadmi hoon main
Aa ja ke muskuraye zamaane guzar gaye
Kya kya tawaqqu'aat theen aaho'on se aye Khumar
Yeh teer bhi chalaye zamaane guzar gaye
شاعر کے بارے میں
خُمار بارہ بنکوی، جن کا اصل نام محمد حیدر خان تھا، 19 ستمبر 1919 کو بارہ بنکی، اتر پردیش میں پیدا ہوئے۔ وہ ایک تہذیبی اور ادبی ماحول رکھنے والے گھر...
مکمل تعارف پڑھیں