مشکل ہے کہ اب شہر میں نکلے کوئی گھر سے — پروین شاکر
شاعر
مشکل ہے کہ اب شہر میں نکلے کوئی گھر سے
مشکل ہے کہ اب شہر میں نکلے کوئی گھر سے
دستار پہ بات آ گئی ہوتی ہوئی سر سے
برسا بھی تو کس دشت کے بے فیض بدن پر
اک عمر مرے کھیت تھے جس ابر کو ترسے
کل رات جو ایندھن کے لیے کٹ کے گرا ہے
چڑیوں کو بڑا پیار تھا اس بوڑھے شجر سے
محنت مری آندھی سے تو منسوب نہیں تھی
رہنا تھا کوئی ربط شجر کا بھی ثمر سے
خود اپنے سے ملنے کا تو یارا نہ تھا مجھ میں
میں بھیڑ میں گم ہو گئی تنہائی کے ڈر سے
بے نام مسافت ہی مقدر ہے تو کیا غم
منزل کا تعین کبھی ہوتا ہے سفر سے
پتھرایا ہے دل یوں کہ کوئی اسم پڑھا جائے
یہ شہر نکلتا نہیں جادو کے اثر سے
نکلے ہیں تو رستے میں کہیں شام بھی ہوگی
سورج بھی مگر آئے گا اس رہ گزر سے
Mushkil hai ke ab shehar maiñ nikle koī ghar se
Mushkil hai ke ab shehar maiñ nikle koī ghar se
Dastār pe bāt aa gaī hotī huī sar se
Barsā bhī toh kis dasht ke be-faiz badan par
Ek umr mere khet the jis abr ko tarse
Kal rāt jo eñdhan ke liye kaṭ ke girā hai
Chiṛiyoñ ko baṛā pyār thā us būṛhe shajar se
Mehnat merī āñdhī se toh mansūb nahīñ thī
Rehna thā koī rabt shajar kā bhī samar se
Khud apne se milne kā toh yārā na thā mujh maiñ
Maiñ bhīṛ maiñ gum ho gaī tanhāī ke ḍar se
Be-nām musāfat hī muqaddar hai toh kyā gham
Manzil kā ta'ayyun kabhī hotā hai safar se
Pattharāyā hai dil yūñ ke koī ism paṛhā jāe
Yeh shehar nikaltā nahīñ jādū ke asar se
Nikle haiñ toh raste maiñ kahīñ shām bhī hogī
Sūraj bhī magar āe gā us rah-guzar se
شاعر کے بارے میں
پروین شاکر اردو کی جدید ترین اور مقبول ترین شاعرات میں شمار ہوتی ہیں، جنہوں نے نسائی حسّیت، جذبات کی لطافت اور اظہار کی شگفتگی کو نئی جہت عطا کی۔ 2...
مکمل تعارف پڑھیں