کسی بچھڑ جانے والے کے نام — راشد ڈوگر
شاعر
کسی بچھڑ جانے والے کے نام
مجھے یاد ہے وہ ملاقات پہلی
جو فرمائی تُو نے وہی بات پہلی
"نرے خام ہو اور پر تولتے ہو
کہ ساحل سے موج و بھنور تولتے ہو
کتابوں میں چاہت کی بُو سونگھتے ہو
کناروں پہ لعل و گہر ڈھونڈتے ہو
ابھی عشق کے تم نے قصے سُنے ہیں
ابھی راہ سے پھُول پتّے چُنے ہیں
رموزِ وفا سے شناسا نہیں ہو
تماشائی ہو پر تماشا نہیں ہو
چلے جاؤ واپس کہ عاشق نہیں تم
تجسس سے پُر اور حیرت میں ہو گم
چلے آنا تب تم کو ٹھوکر لگی جب
چلے آنا جب دل پہ دستک ہوئی تب “
چلا آیا میں جو ابھی بے سبب تھا
یونہی منحصر گردشِ روز و شب تھا
اسی کشمکش میں گزرتے گئے دن
کہ جیون کے گیہوں کترتے گئے دن
کسی دن اچانک کہیں جا گرا میں
اٹھا تو کسی اور عالم میں تھا میں
وہاں اپنی سرحد سے باہر کھڑا تھا
میں کون اور کیوں ہُوں، کھڑا سوچتا تھا
جہاں تھم گیا تھا، زماں تھم گیا تھا
کسی ایک نقطے پہ دل جم گیا تھا
زمین و زمان و زمن کس لئے ہیں؟
یہ گہوارے ، سہرے ، کفن ، کس لئے ہیں؟
یہ سانسوں کے زہریلے پھن کس لئے ہیں؟
جو مرنا ہے تو سب جتن کس لئے ہیں؟
نگاہیں ملا کر مجھے وہ بتا دے
مجھے کیوں بنایا تھا سمجھا ذرا دے
وہ لمحات تھے سارے صدیوں پہ بھاری
کہ ہستی تھی دانہ تو سوچیں تھی چکّی
میں اپنے ہی گرداب میں آ گِرا تھا
جہاں کوئی کشتی نہ تھا کوئی تنکا
اسی جاں کنی میں کئی سال گزرے
کئی ماضی گزرے کئی حال گزرے
اچانک ہی اک رات عالم جدا تھا
کہ خود کو سپردِ خدا کردیا تھا
نگاہوں سے جیسے کہ دھند چھٹ گئی تھی
ہر اک شے پہ اس کی حقیقت لکھی تھی
وہ دنیا نئی تھی زمانہ نیا تھا
نیا تھا پرانا، پرانا نیا تھا
نئی چال سے تب روانہ ہوا میں
اسی حال میں آکے تم سے ملا میں
اسی روز سے میرے ہمراز ٹھہرے
کہ استاد ٹھہرے تو دم ساز ٹھہرے
تھا انگلی پکڑ پھر سے چلنا سکھایا
نئے آسمانوں پہ اڑنا سکھایا
ہو اب تم کسی اور عالم کے باسی
کسی طَور جاتی نہیں یہ اداسی
تصور میں لیکن ہو تم ساتھ میرے
مرے دل کو رکھے تری یاد گھیرے
مرے پاس تیری نشانی یہی ہے
کہانی نہیں یہ، کہانی یہی ہے
Kisi Bichhad Jaane Waale Ke Naam
Mujhe yaad hai woh mulaqat pehli
Jo farmaai tu ne wohi baat pehli
"Nire khaam ho aur par tolte ho
Ke sahil se mauj o bhanwar tolte ho
Kitabon mein chahat ki boo soonghte ho
Kinaaron pe la'l o guhar dhoondhte ho
Abhi ishq ke tum ne qisse sune hain
Abhi raah se phool patte chune hain
Ramooz-e-wafa se shanaasa nahin ho
Tamashai ho par tamasha nahin ho
Chale jaao wapas ke aashiq nahin tum
Tajassus se pur aur hairat mein ho gum
Chale aana tab tum ko thhokar lagi jab
Chale aana jab dil pe dastak hui tab "
Chala aaya main jo abhi be-sabab thha
Yunhi munhasir gardish-e-roz o shab thha
Isi kashmakash mein guzarte gaye din
Ke jeevan ke gehoon katrate gaye din
Kisi din achaanak kahin ja gira main
Uthha to kisi aur aalam mein thha main
Wahan apni sarhad se bahar khada thha
Main kaun aur kiyun hoon, khada sochta thha
Jahan tham gaya thha, zamaan tham gaya thha
Kisi ek nuqte pe dil jam gaya thha
Zameen o zamaan o zamin kis liye hain?
Yeh gehwaare, sehre, kafan, kis liye hain?
Yeh saanson ke zehreele phan kis liye hain?
Jo marna hai to sab jatan kis liye hain?
Nigahein mila kar mujhe woh bata de
Mujhe kiyun banaya thha samjha zara de
Woh lamhaat thhe saare sadiyon pe bhaari
Ke hasti thi daana to sochein theen chakki
Main apne hi girdab mein aa gira thha
Jahan koi kashti na thha koi tinka
Isi jaan-kani mein kayi saal guzre
Kayi maazi guzre kayi haal guzre
Achanak hi ik raat aalam juda thha
Ke khud ko supurd-e-khuda kar diya thha
Nigahon se jaise ke dhund chhat gayi thi
Har ik shai pe us ki haqeeqat likhi thi
Woh duniya nayi thi zamana naya thha
Naya thha purana, purana naya thha
Nayi chaal se tab rawana hua main
Isi haal mein aake tum se mila main
Isi roz se mere hamraaz thhehre
Ke ustaad thhehre to dam-saaz thhehre
Thha ungli pakad phir se chalna sikhaya
Naye aasmano pe udna sikhaya
Ho ab tum kisi aur aalam ke baasi
Kisi taur jaati nahin yeh udaasi
Tasawwur mein lekin ho tum saath mere
Mere dil ko rakhe teri yaad ghere
Mere paas teri nishani yehi hai
Kahani nahin yeh, kahani yehi hai
شاعر کے بارے میں
شاید شاعر، غالباً ادیب، قریباً ان پڑھ، یقیناً گناہگار،سر بہ خاکِ مدینہ
مکمل تعارف پڑھیں