دل میں اُترے نہ اُداسی سے بھری کہلائے — سعید شارق
شاعر
دل میں اُترے نہ اُداسی سے بھری کہلائے
دل میں اُترے نہ اُداسی سے بھری کہلائے
کوئی تو شام ہو ایسی جو نئی کہلائے
ایک آواز جو آنکھوں کے لیے چشمہ ہو
ایک احساس جو ہاتھوں کی چھڑی کہلائے
ہندسے، سوئیاں پھر میری کلائی پہ کھنچیں
وقت دونوں کا ، گھڑی صرف تری کہلائے
اک نظر ہی میں اُسے دیکھ لیا ہے اتنا
آنکھ خالی بھی اگر ہو تو بھری کہلائے
داستاں بنتی گئی ، دیو میں ڈھلتا گیا مَیں
اُس کی خواہش تھی کہ وہ خودبھی پری کہلائے
دل میں اُڑتا یہ اُداسی کا پرندہ ، شارقؔ
شاخِ لب پر کبھی بیٹھے تو ہنسی کہلائے
Dil mein utre na udaasi se bhari kehlaye
Dil mein utre na udaasi se bhari kehlaye
Koi to shaam ho aisi jo nayi kehlaye
Ek awaaz jo aankhon ke liye chashma ho
Ek ehsaas jo haathon ki chhadi kehlaye
Hindse, suiyan phir meri kalayi pe khinchien
Waqt donon ka, ghadi sirf teri kehlaye
Ik nazar hi mein use dekh liya hai itna
Aankh khali bhi agar ho to bhari kehlaye
Daastaan banti gayi, dev mein dhalta gaya main
Uski khwahish thi ke woh khud bhi pari kehlaye
Dil mein udta yeh udaasi ka parinda, Shariq!
Shaakh-e-lab par kabhi baithe to hansi kehlaye
شاعر کے بارے میں
نوجوان شاعر سعید شارق کا اصل نام محمد اجمل سعید ہے۔ وہ 03 جون 1993ء کو اسلام آباد میں پیدا ہوئے۔ انھوں نے بی ایس انجینئرنگ ٹیکنالوجی ( مکینیکل) می...
مکمل تعارف پڑھیں