خود ہی گرفتِ غم سے خوشی چُھوٹ جائے گی — سعید شارق
شاعر
خود ہی گرفتِ غم سے خوشی چُھوٹ جائے گی
خود ہی گرفتِ غم سے خوشی چُھوٹ جائے گی
گریہ کروں گا اور ہنسی چُھوٹ جائے گی
ہاتھوں میں اتنی رسّیاں تھامے ہوئے ہوں میں
چھوڑوں گا کوئی اور کوئی چُھوٹ جائے گی
دِل ہی سے آ کے لگتی ہے یہ رہ گُزار بھی
گھر چھوڑ دُوں تو خُود ہی گلی چُھوٹ جائے گی
وہ پیڑ بھی نہ توڑنے دے گا ثمر مجھے
یہ شاخ بھی سرکتی ہوئی چُھوٹ جائے گی
آزاد کر رہا ہوں میں زنجیرِ خواب کو
جو رہ گئی ہے وہ بھی کڑی، چُھوٹ جائے گی
مچھلی کی طرح تیرتی رہتی ہے دِل میں یاد
ہاتھ آئے گی یونہی تو یونہی چُھوٹ جائے گی
اک روز سیکھ لوں گا میں چلنا ترے بغیر
اک روز ہاتھ سے یہ چھڑی چُھوٹ جائے گی
بیٹھا ہُوا ہوں کب سے زمانے کی ریل میں
لگتا ہے پھر بھی جیسے ابھی چُھوٹ جائے گی
Khud hi girift-e-gham se khushi chhoot jaayegi
Khud hi girift-e-gham se khushi chhoot jaayegi
Giriya karun ga aur hansi chhoot jaayegi
Haathon mein itni rassiyaan thaame hue hun main
Chhodun ga koi aur koi chhoot jaayegi
Dil hi se aa ke lagti hai yeh reh-guzar bhi
Ghar chhod dun to khud hi gali chhoot jaayegi
Woh ped bhi na todne dega samar mujh se
Yeh shakh bhi sarakti hui chhoot jaayegi
Azaad kar raha hun main zanjeer-e-khwab ko
Jo reh gayi hai woh bhi kadi, chhoot jaayegi
Machhli ki tarah tairti rehti hai dil mein yaad
Haath aayegi yunhi to yunhi chhoot jaayegi
Ek roz seekh lun ga main chalna tere baghair
Ek roz haath se yeh chhadi chhoot jaayegi
Baitha hua hun kab se zamaane ki rail mein
Lagta hai phir bhi jaise abhi chhoot jaayegi
شاعر کے بارے میں
نوجوان شاعر سعید شارق کا اصل نام محمد اجمل سعید ہے۔ وہ 03 جون 1993ء کو اسلام آباد میں پیدا ہوئے۔ انھوں نے بی ایس انجینئرنگ ٹیکنالوجی ( مکینیکل) می...
مکمل تعارف پڑھیں