سانس کی دھار ذرا گھِستی ذرا کاٹتی ہے — سعید شارق
شاعر
سانس کی دھار ذرا گھِستی ذرا کاٹتی ہے
سانس کی دھار ذرا گھِستی ذرا کاٹتی ہے
کیا درانتی ہے کہ خود فصلِ فنا کاٹتی ہے
ایک تصویر جو دیوار سے اُلجھی تھی کبھی
اب مری نظروں میں رہنے کی سزا کاٹتی ہے
تیری سرگوشی سے کٹ جاتا ہے یوں سنگِ سکوت
جس طرح حبس کے پتھر کو ہَوا کاٹتی ہے
قطع کرتا ہے مرے حلقۂ ویرانی کو
نیند جو موڑ، پسِ خواب سرا، کاٹتی ہے
یونہی گرتی نہیں اشکوں کی سیاہی دل پر
ان کہا لکھتی کبھی لکھّا ہُوا کاٹتی ہے
شام کے خون سے اٹ جاتا ہے زندان کا فرش
اور پھر رات مرے دن کا گلا کاٹتی ہے
چیخنا چاہوں تو ڈستی ہے خموشی، شارقؔ
چُپ رہوں تو مجھے زہریلی صدا کاٹتی ہے
Saans ki dhaar zara ghisti zara kaat-ti hai
Saans ki dhaar zara ghisti zara kaat-ti hai
Kya daranti hai ke khud fasl-e-fana kaat-ti hai
Ek tasveer jo deewar se uljhi thi kabhi
Ab meri nazron mein rehne ki saza kaat-ti hai
Teri sargoshi se kat jata hai yun sang-e-sukoot
Jis tarah habs ke patthar ko hawa kaat-ti hai
Qata' karta hai mere halqa-e-veerani ko
Neend jo mod, pas-e-khwab sara, kaat-ti hai
Yunhi girti nahin ashkon ki siyahi dil par
Un kaha likhti kabhi likha hua kaat-ti hai
Shaam ke khoon se at jata hai zindan ka farsh
Aur phir raat mere din ka gala kaat-ti hai
Cheekhna chahoon to dasti hai khamoshi, Shariq!
Chup rahoon to mujhe zehreeli sada kaat-ti hai
شاعر کے بارے میں
نوجوان شاعر سعید شارق کا اصل نام محمد اجمل سعید ہے۔ وہ 03 جون 1993ء کو اسلام آباد میں پیدا ہوئے۔ انھوں نے بی ایس انجینئرنگ ٹیکنالوجی ( مکینیکل) می...
مکمل تعارف پڑھیں