تیری گفتار میں تو پیار کے تیور کم تھے
تیری گفتار میں تو پیار کے تیور کم تھے کبھی جھانکا تری آنکھوں میں تو ہم ہی ہم تھے لمس کے دم سے بصارت بھی، بصیرت بھی ملی چُھو کے دیکھا تو جو پتھر تھے نرے ریشم تھے تیری یادیں کبھی ہنستی تھیں، کبھی روتی تھیں میرے گھر کے یہی ہیرے تھے، یہی نیلم تھے برف گرماتی رہی، دھوپ اماں دیتی رہی دل کی نگری میں جو موسم تھے، ترے موسم تھے مری پونجی مرے اپنے ہی لہو کی تھی کشید زندگی بھر کی کمائی میرے اپنے غم تھے آنسوؤں نے عجب انداز میں سیراب کیا کہیں بھیگے ہوئے آنچل، کہیں باطن نم تھے جن کے دامن کی ہوا میرے چراغوں پہ چلی وہ کوئی اور کہاں تھے وہ مرے ہمدم تھے میں نے پایا تھا بس اتنا ہی صداقت کا سُراغ دُور تک پھیلتے خاکے تھے، مگر مبہم تھے میں نے گرنے نہ دیا مر کے بھی معیارِ وقار ڈوبتے وقت مرے ہاتھ مرے پرچم تھے میں سرِ عرش بھی پہنچا تو سرِ فرش رہا کائناتوں کے سب امکاں مرے اندر ضم تھے عمر بھر خاک میں جو اشک ہوئے جذب ندیم برگِ گل پر کبھی ٹپکے تو وہی شبنم تھے
English rendering
Teri guftaar mein to pyaar ke tewar kam the Kabhi jhanka teri aankhon mein to hum hi hum the Lams ke dam se basarat bhi, baseerat bhi mili Chhu ke dekha to jo patthar the nire resham the Teri yaadein kabhi hansti theen, kabhi roti theen Mere ghar ke yahi heere the, yahi neelam the Barf garmaati rahi, dhoop aman deti rahi Dil ki nagri mein jo mausam the, tere mausam the Meri poonji mere apne hi lahu ki thi kasheed Zindagi bhar ki kamai mere apne gham the Aansuon ne ajab andaaz mein sairaab kiya Kahin bheege hue aanchal, kahin baatin nam the Jin ke daaman ki hawa mere chiragon pe chali Woh koi aur kahan the woh mere hamdam the Maine paya tha bas itna hi sadaqat ka suraagh Door tak pheelte khake the, magar mubham the Maine girne na diya mar ke bhi miyaar-e-waqaar Doobte waqt mere haath mere parcham the Main sar-e-arsh bhi pahuncha to sar-e-farsh raha Kainaton ke sab imkaan mere andar zam the Umar bhar khaak mein jo ashk hue jazb Nadeem Barg-e-gul par kabhi tapke to wahi shabnam the