نئی تہذیب — اکبر اللہ آبادی

Nayi Tehzeeb

Yeh maujooda tareeqe raahi-e-mulk-e-adam honge
Nayi tehzeeb hogi aur naye samaan baham honge
Naye unwaan se zeenat dikhayenge haseen apni
Na aisa pech zulfon mein na gesu mein yeh kham honge
Na khaatoonon mein reh jaayegi parde ki yeh pabandi
Na ghoonghat is tarah se hajib-e-roo-e-sanam honge
Badal jaayega andaaz-e-tabaye daur-e-gardoon se
Nayi soorat ki khushiyan aur naye asbab-e-gham honge
Na paida hogi khat-e-naskh se shaan-e-adab aageen
Na nasta'leeq harf is taur se zeb-e-raqam honge
Khabar deti hai tehreek-e-hawa tabdeel-e-mausam ki
Khulenge aur hi gul zamzame bulbul ke kam honge
Aqaid par qayamat aayegi tarmeem-e-millat se
Naya kaaba banega maghribi putle sanam honge
Bahut honge mughanni naghma-e-taqleed-e-Europe ke
Magar be-jod honge is liye be-taal o sam honge
Hamari istilahaon se zubaan naa-aashna hogi
Lughaat-e-maghribi bazaar ki bhasha se zam honge
Badal jaayega mayar-e-sharafat chashm-e-duniya mein
Ziyada the jo apne za'am mein woh sab se kam honge
Guzishta azmaton ke tazkiray bhi reh na jaayenge
Kitabon hi mein dafan afsana-e-jah o hasham honge
Kisi ko is taghayyur ka na hiss hoga na gham hoga
Hue jis saaz se paida isi ke zer o bam honge
Tumhein is inqilaab-e-dehr ka kya gham hai aye Akbar!
Bahut nazdeek hain woh din ke tum hoge na hum honge