ہجر کے موسم میں یادیں وصل کی راتوں میں ہیں
ہجر کے موسم میں یادیں وصل کی راتوں میں ہیں کچھ گلے شکوے یقیناً سب مناجاتوں میں ہیں دھوپ کے موسم میں تھے پایاب دریا سب مگر کیسے کیسے خشک منظر اب کے برساتوں میں ہیں ہیں معطر اب بھی شامیں تیری خوشبو کے طفیل ضو فشاں جگنو ترے اب بھی مری راتوں میں ہیں تشنگی صدیوں کی قربت سے نہ بجھ پائی مری لوگ کتنے مطمئن تھوڑی ملاقاتوں میں ہیں دوسروں نے اپنی تقدیروں کے بل سلجھا لئے زلف پیچاں ہم ابھی الجھے تری باتوں میں ہیں بس گئے شہر حقیقت میں وہ جن کے دل نہیں اہل دل تو اب بھی خوابوں کے مضافاتوں میں ہیں آج ٹوٹے گا یقیناً پھر طلسم آئنہ سارے چہرے مشتعل ہیں سنگ سب ہاتھوں میں ہیں
English rendering
Hijr ke mausam mein yaadein wasl ki raaton mein hain Kuch gile shikwe yaqeenan sab munajaton mein hain Dhoop ke mausam mein the payab darya sab magar Kaise kaise khushk manzar ab ke barsaton mein hain Hain muattar ab bhi shaamein teri khushboo ke tufail Zau-fishan jugnu tere ab bhi meri raaton mein hain Tishnagi sadiyon ki qurbat se na bujh paai meri Log kitne mutmain thodi mulaqaton mein hain Dusron ne apni taqdeeron ke bal suljha liye Zulf-e-peechan hum abhi uljhe teri baaton mein hain Bas gaye shahr-e-haqeeqat mein woh jin ke dil nahin Ahl-e-dil to ab bhi khwabon ke muzafaton mein hain Aaj tootega yaqeenan phir tilism-e-aaina Saare chehre mushta'il hain sang sab hathon mein hain