آج بھی قافلۂ عشق رواں ہے کہ جو تھا — فراق گورکھپوری
شاعر
آج بھی قافلۂ عشق رواں ہے کہ جو تھا
آج بھی قافلۂ عشق رواں ہے کہ جو تھا
وہی میل اور وہی سنگ نشاں ہے کہ جو تھا
پھر ترا غم وہی رسوائے جہاں ہے کہ جو تھا
پھر فسانہ بحدیث دگراں ہے کہ جو تھا
منزلیں گرد کے مانند اڑی جاتی ہیں
وہی انداز جہان گزراں ہے کہ جو تھا
ظلمت و نور میں کچھ بھی نہ محبت کو ملا
آج تک ایک دھندلکے کا سماں ہے کہ جو تھا
یوں تو اس دور میں بے کیف سی ہے بزم حیات
ایک ہنگامہ سر رطل گراں ہے کہ جو تھا
لاکھ کر جور و ستم لاکھ کر احسان و کرم
تجھ پہ اے دوست وہی وہم و گماں ہے کہ جو تھا
آج پھر عشق دو عالم سے جدا ہوتا ہے
آستینوں میں لیے کون و مکاں ہے کہ جو تھا
عشق افسردہ نہیں آج بھی افسردہ بہت
وہی کم کم اثر سوز نہاں ہے کہ جو تھا
نظر آ جاتے ہیں تم کو تو بہت نازک بال
دل مرا کیا وہی اے شیشہ گراں ہے کہ جو تھا
جان دے بیٹھے تھے اک بار ہوس والے بھی
پھر وہی مرحلۂ سود و زیاں ہے کہ جو تھا
آج بھی صید گہ عشق میں حسن سفاک
لیے ابرو کی لچکتی سی کماں ہے کہ جو تھا
پھر تری چشم سخن سنج نے چھیڑی کوئی بات
وہی جادو ہے وہی حسن بیاں ہے کہ جو تھا
رات بھر حسن پر آئے بھی گئے سو سو رنگ
شام سے عشق ابھی تک نگراں ہے کہ جو تھا
جو بھی کر جور و ستم جو بھی کر احسان و کرم
تجھ پہ اے دوست وہی وہم و گماں ہے کہ جو تھا
آنکھ جھپکی کہ ادھر ختم ہوا روز وصال
پھر بھی اس دن پہ قیامت کا گماں ہے کہ جو تھا
قرب ہی کم ہے نہ دوری ہی زیادہ لیکن
آج وہ ربط کا احساس کہاں ہے کہ جو تھا
تیرہ بختی نہیں جاتی دل سوزاں کی فراقؔ
شمع کے سر پہ وہی آج دھواں ہے کہ جو تھا
Aaj Bhi Qafila-e-Ishq Rawan Hai Ke Jo Tha
Aaj bhi qafila-e-ishq rawan hai ke jo tha
Wohi mail aur wohi sang-e-nishan hai ke jo tha
Phir tera gham wohi ruswa-e-jahan hai ke jo tha
Phir fasana ba-hadees-e-digaran hai ke jo tha
Manzilain gard ke manind udi jaati hain
Wohi andaaz-e-jahan-e-guzaran hai ke jo tha
Zulmat o noor mein kuchh bhi na mohabbat ko mila
Aaj tak ek dhundalke ka samaan hai ke jo tha
Yun to is daur mein be-kaif si hai bazm-e-hayat
Ek hangama sar-e-ratl-e-giran hai ke jo tha
Lakh kar jaur-o-sitam lakh kar ehsan-o-karam
Tujh pe ae dost wohi vehm-o-guman hai ke jo tha
Aaj phir ishq do alam se juda hota hai
Aasteenon mein liye kaun-o-makan hai ke jo tha
Ishq afsurda nahin aaj bhi afsurda bahut
Wohi kam kam asar-e-soz-e-nihan hai ke jo tha
Nazar aa jaate hain tum ko to bahut nazuk baal
Dil mera kya wohi ae sheesha-garan hai ke jo tha
Jaan de baithe the ek baar havas wale bhi
Phir wohi marhala-e-sood-o-ziyan hai ke jo tha
Aaj bhi said-gah-e-ishq mein husn-e-saffak
Liye abroo ki lachakti si kamaan hai ke jo tha
Phir teri chashm-e-sukhan-sanj ne chhedi koi baat
Wohi jadoo hai wohi husn-e-bayan hai ke jo tha
Raat bhar husn par aaye bhi gaye sau sau rang
Shaam se ishq abhi tak nigran hai ke jo tha
Jo bhi kar jaur-o-sitam jo bhi kar ehsan-o-karam
Tujh pe ae dost wohi vehm-o-guman hai ke jo tha
Aankh jhapki ke idhar khatm hua roz-e-visal
Phir bhi is din pe qayamat ka guman hai ke jo tha
Qurb hi kam hai na doori hi zyada lekin
Aaj woh rabt ka ehsas kahan hai ke jo tha
Teera-bakhti nahin jaati dil-e-sozan ki Firaq
Shama' ke sar pe wohi aaj dhuan hai ke jo tha