زیر و بم سے ساز خلقت کے جہاں بنتا گیا — فراق گورکھپوری
شاعر
زیر و بم سے ساز خلقت کے جہاں بنتا گیا
زیر و بم سے ساز خلقت کے جہاں بنتا گیا
یہ زمیں بنتی گئی یہ آسماں بنتا گیا
داستان جور بے حد خون سے لکھتا رہا
قطرہ قطرہ اشک غم کا بے کراں بنتا گیا
عشق تنہا سے ہوئیں آباد کتنی منزلیں
اک مسافر کارواں در کارواں بنتا گیا
میں ترے جس غم کو اپنا جانتا تھا وہ بھی تو
زیب عنوان حدیث دیگراں بنتا گیا
بات نکلے بات سے جیسے وہ تھا تیرا بیاں
نام تیرا داستاں در داستاں بنتا گیا
ہم کو ہے معلوم سب روداد علم و فلسفہ
ہاں ہر ایمان و یقیں وہم و گماں بنتا گیا
میں کتاب دل میں اپنا حال غم لکھتا رہا
ہر ورق اک باب تاریخ جہاں بنتا گیا
بس اسی کی ترجمانی ہے مرے اشعار میں
جو سکوت راز رنگیں داستاں بنتا گیا
میں نے سونپا تھا تجھے اک کام ساری عمر میں
وہ بگڑتا ہی گیا اے دل کہاں بنتا گیا
واردات دل کو دل ہی میں جگہ دیتے رہے
ہر حساب غم حساب دوستاں بنتا گیا
میری گھٹی میں پڑی تھی ہو کے حل اردو زباں
جو بھی میں کہتا گیا حسن بیاں بنتا گیا
وقت کے ہاتھوں یہاں کیا کیا خزانے لٹ گئے
ایک تیرا غم کہ گنج شائیگاں بنتا گیا
سر زمین ہند پر اقوام عالم کے فراقؔ
قافلے بستے گئے ہندوستاں بنتا گیا
Zair o bam se saaz-e-khilqat ke jahan banta gaya
Zair o bam se saaz-e-khilqat ke jahan banta gaya
Yeh zameen banti gai yeh aasmaan banta gaya
Dastaan-e-jaur-e-behad khoon se likhta raha
Qatra qatra ashk-e-gham ka be-karaan banta gaya
Ishq tanha se hu.een aabaad kitni manzilein
Ek musafir karvaan dar karvaan banta gaya
Main tere jis gham ko apna jaanta tha voh bhi to
Zeb-e-unvaan-e-hadees-e-digaraan banta gaya
Baat nikle baat se jaise voh tha tera bayaan
Naam tera dastaan dar dastaan banta gaya
Ham ko hai maloom sab roodaad-e-ilm o falsafa
Haan har imaan o yaqeen vahm o gumaan banta gaya
Main kitab-e-dil mein apna haal-e-gham likhta raha
Har varaq ek baab-e-tareekh-e-jahan banta gaya
Bas isi ki tarjumani hai mere ash'aar mein
Jo sukoot-e-raaz-e-rangeen dastaan banta gaya
Main ne saunpa tha tujhe ek kaam saari umar mein
Voh bigaRta hi gaya ai dil kahan banta gaya
Vardaat-e-dil ko dil hi mein jagah dete rahe
Har hisab-e-gham hisab-e-dostaan banta gaya
Meri ghuTTi mein paRi thi ho ke hal Urdu zabaan
Jo bhi main kehta gaya husn-e-bayaan banta gaya
Vaqt ke haathon yahan kya kya khazane luT ga.e
Ek tera gham ke ganj-e-shaa'egaan banta gaya
Sar-zameen-e-Hind par aqvaam-e-aalam ke Firaq
Qaafle baste ga.e Hindustan banta gaya