یہ نکہتوں کی نرم روی یہ ہوا یہ رات — فراق گورکھپوری
شاعر
یہ نکہتوں کی نرم روی یہ ہوا یہ رات
یہ نکہتوں کی نرم روی یہ ہوا یہ رات
یاد آ رہے ہیں عشق کو ٹوٹے تعلقات
مایوسیوں کی گود میں دم توڑتا ہے عشق
اب بھی کوئی بنا لے تو بگڑی نہیں ہے بات
کچھ اور بھی تو ہو ان اشارات کے سوا
یہ سب تو اے نگاہ کرم بات بات بات
اک عمر کٹ گئی ہے ترے انتظار میں
ایسے بھی ہیں کہ کٹ نہ سکی جن سے ایک رات
ہم اہل انتظار کے آہٹ پہ کان تھے
ٹھنڈی ہوا تھی غم تھا ترا ڈھل چلی تھی رات
یوں تو بچی بچی سی اٹھی وہ نگاہ ناز
دنیائے دل میں ہو ہی گئی کوئی واردات
جن کا سراغ پا نہ سکی غم کی روح بھی
ناداں ہوئے ہیں عشق میں ایسے بھی سانحات
ہر سعی و ہر عمل میں محبت کا ہاتھ ہے
تعمیر زندگی کے سمجھ کچھ محرکات
اس جا تری نگاہ مجھے لے گئی جہاں
لیتی ہو جیسے سانس یہ بے جان کائنات
کیا نیند آئے اس کو جسے جاگنا نہ آئے
جو دن کو دن کرے وہ کرے رات کو بھی رات
دریا کے مد و جزر بھی پانی کے کھیل ہیں
ہستی ہی کے کرشمے ہیں کیا موت کیا حیات
اہل رضا میں شان بغاوت بھی ہو ذرا
اتنی بھی زندگی نہ ہو پابند رسمیات
ہم اہل غم نے رنگ زمانہ بدل دیا
کوشش تو کی سبھی نے مگر بن پڑے کی بات
پیدا کرے زمین نئی آسماں نیا
اتنا تو لے کوئی اثر دور کائنات
شاعر ہوں گہری نیند میں ہیں جو حقیقتیں
چونکا رہے ہیں ان کو بھی میرے توہمات
مجھ کو تو غم نے فرصت غم بھی نہ دی فراقؔ
دے فرصت حیات نہ جیسے غم حیات
Yeh nikhaton ki narm ravi yeh hava yeh raat
Yeh nikhaton ki narm ravi yeh hava yeh raat
Yaad aa rahe hain ishq ko tute ta'alluqaat
Mayusiyon ki god mein dam toRta hai ishq
Ab bhi koi bana le to bigRi nahin hai baat
Kuchh aur bhi to ho in ishaaraat ke siva
Yeh sab to ai nigah-e-karam baat baat baat
Ek umar kaT gai hai tere intizaar mein
Aise bhi hain ke kaT na saki jin se ek raat
Ham ahl-e-intizaar ke aahaT pe kaan the
Thandi hava thi gham tha tera Dhal chali thi raat
Yun to bachi bachi si uThi voh nigah-e-naaz
Duniya-e-dil mein ho hi gai koi vaardaat
Jin ka suraagh pa na saki gham ki rooh bhi
Naadaan hue hain ishq mein aise bhi saanehat
Har sa'ee o har amal mein mohabbat ka haath hai
Ta'meer-e-zindagi ke samajh kuchh muharrikaat
Is ja teri nigah mujhe le gai jahan
Leti ho jaise saans yeh bejaan ka'enaat
Kya neend aa.e us ko jise jaagna na aa.e
Jo din ko din kare voh kare raat ko bhi raat
Dariya ke mad-o-jazr bhi paani ke khel hain
Hasti hi ke karishme hain kya maut kya hayaat
Ahl-e-raza mein shaan-e-baghavat bhi ho zara
Itni bhi zindagi na ho paband-e-rasmiyaat
Ham ahl-e-gham ne rang-e-zamana badal diya
Koshish to ki sabhi ne magar ban paRe ki baat
Paida kare zameen na'i aasmaan naya
Itna to le koi asar daur-e-ka'enaat
Shaa'ir hoon gehri neend mein hain jo haqeeqaten
Chonka rahe hain un ko bhi mere tawahhumaat
Mujh ko to gham ne fursat-e-gham bhi na di Firaq
De fursat-e-hayaat na jaise gham-e-hayaat