اپنے غم کا مجھے کہاں غم ہے — فراق گورکھپوری
شاعر
اپنے غم کا مجھے کہاں غم ہے
اپنے غم کا مجھے کہاں غم ہے
اے کہ تیری خوشی مقدم ہے
آگ میں جو پڑا وہ آگ ہوا
حسن سوز نہاں مجسم ہے
اس کے شیطان کو کہاں توفیق
عشق کرنا گناہ آدم ہے
دل کے دھڑکوں میں زور ضرب کلیم
کس قدر اس حباب میں دم ہے
ہے وہی عشق زندہ و جاوید
جسے آب حیات بھی سم ہے
اس میں ٹھہراؤ یا سکون کہاں
زندگی انقلاب پیہم ہے
اک تڑپ موج تہ نشیں کی طرح
زندگی کی بنائے محکم ہے
رہتی دنیا میں عشق کی دنیا
نئے عنوان سے منظم ہے
اٹھنے والی ہے بزم ماضی کی
روشنی کم ہے زندگی کم ہے
یہ بھی نظم حیات ہے کوئی
زندگی زندگی کا ماتم ہے
اک معمہ ہے زندگی اے دوست
یہ بھی تیری ادائے مبہم ہے
اے محبت تو اک عذاب سہی
زندگی بے ترے جہنم ہے
اک تلاطم سا رنگ و نکہت کا
پیکر ناز میں دما دم ہے
پھرنے کو ہے رسیلی نیم نگاہ
آہوئے ناز مائل رم ہے
روپ کے جوت زیر پیراہن
گلستاں پر ردائے شبنم ہے
میرے سینے سے لگ کے سو جاؤ
پلکیں بھاری ہیں رات بھی کم ہے
آہ یہ مہربانیاں تیری
شادمانی کی آنکھ پر نم ہے
نرم و دوشیزہ کس قدر ہے نگاہ
ہر نظر داستان مریم ہے
مہر و مہ شعلہ ہائے ساز جمال
جس کی جھنکار اتنی مدھم ہے
جیسے اچھلے جنوں کی پہلی شام
اس ادا سے وہ زلف برہم ہے
یوں بھی دل میں نہیں وہ پہلی امنگ
اور تیری نگاہ بھی کم ہے
اور کیوں چھیڑتی ہے گردش چرخ
وہ نظر پھر گئی یہ کیا کم ہے
روکش صد حریم دل ہے فضا
وہ جہاں ہیں عجیب عالم ہے
دئے جاتی ہے لو صدائے فراقؔ
ہاں وہی سوز و ساز کم کم ہے
Apne Gham Ka Mujhe Kahan Gham Hai
Apne gham ka mujhe kahan gham hai
Ae ke teri khushi muqaddam hai
Aag mein jo pada woh aag hua
Husn-e-soz-e-nihan mujassam hai
Us ke shaitan ko kahan taufeeq
Ishq karna gunah-e-Adam hai
Dil ke dhadkon mein zor-e-zarb-e-Kaleem
Kis qadar is habab mein dam hai
Hai wohi ishq zinda o javed
Jise aab-e-hayat bhi sam hai
Is mein thehrao ya sukoon kahan
Zindagi inqalab-e-paiham hai
Ek tadap mauj-e-teh-nasheen ki tarah
Zindagi ki bana-e-muhkam hai
Rehti dunya mein ishq ki dunya
Naye unwan se munazzam hai
Uthne wali hai bazm-e-maazi ki
Roshni kam hai zindagi kam hai
Yeh bhi nazm-e-hayat hai koi
Zindagi zindagi ka matam hai
Ek mu'amma hai zindagi ae dost
Yeh bhi teri ada-e-mubham hai
Ae mohabbat tu ek azab sahi
Zindagi be-tere jahannam hai
Ek talatum sa rang o nikhat ka
Paikar-e-naz mein dama dam hai
Phirne ko hai raseeli neem-nigah
Aahoo-e-naz mail-e-ram hai
Roop ke jot zeere-pairahan
Gulistan par rida-e-shabnam hai
Mere seene se lag ke so jao
Palkein bhari hain raat bhi kam hai
Aah yeh mehrbaniyan teri
Shadmani ki aankh par nam hai
Naram o dosheeza kis qadar hai nigah
Har nazar dastan-e-Maryam hai
Mehr o mah shola-haaye-saaz-e-jamal
Jis ki jhankār itni madham hai
Jaise uchhle junoon ki pehli sham
Is ada se woh zulf-e-barham hai
Yun bhi dil mein nahin woh pehli umang
Aur teri nigah bhi kam hai
Aur kyun chhedti hai gardish-e-charkh
Woh nazar phir gayi yeh kya kam hai
Rukash-e-sad-hareem-e-dil hai fiza
Woh jahan hain ajeeb alam hai
Diye jaati hai lau sada-e-Firaq
Haan wohi soz o saaz kam kam hai