بے ٹھکانے ہے دل غمگیں ٹھکانے کی کہو — فراق گورکھپوری
شاعر
بے ٹھکانے ہے دل غمگیں ٹھکانے کی کہو
بے ٹھکانے ہے دل غمگیں ٹھکانے کی کہو
شام ہجراں دوستو کچھ اس کے آنے کی کہو
ہاں نہ پوچھ اک گرفتار قفس کی زندگی
ہم صفیران چمن کچھ آشیانے کی کہو
اڑ گیا ہے منزل دشوار میں غم کا سمند
گیسوئے پر پیچ و خم کے تازیانے کی کہو
بات بنتی اور باتوں سے نظر آتی نہیں
اس نگاہ ناز کی باتیں بنانے کی کہو
داستاں وہ تھی جسے دل بجھتے بجھتے کہہ گیا
شمع بزم زندگی کے جھلملانے کی کہو
کچھ دل مرحوم کی باتیں کرو اے اہل علم
جس سے ویرانے تھے آباد اس دوانے کی کہو
داستان زندگی بھی کس قدر دلچسپ ہے
جو ازل سے چھڑ گیا ہے اس فسانے کی کہو
یہ فسون نیم شب یہ خواب ساماں خامشی
سامری فن آنکھ کے جادو جگانے کی کہو
کوئی کیا کھائے گا یوں سچی قسم جھوٹی قسم
اس نگاہ ناز کی سوگندھ کھانے کی کہو
شام ہی سے گوش بر آواز ہے بزم سخن
کچھ فراقؔ اپنی سناؤ کچھ زمانے کی کہو
Be Thikane Hai Dil Ghamgeen Thikane Ki Kaho
Be thikane hai dil-e-ghamgeen thikane ki kaho
Shaam-e-hijran dosto kuchh us ke aane ki kaho
Haan na poochh ek girftar-e-qafas ki zindagi
Hum-safeeran-e-chaman kuchh aashiyane ki kaho
Ud gaya hai manzil-e-dushwar mein gham ka samand
Gisoo-e-pur-pech-o-kham ke taziyane ki kaho
Baat banti aur baaton se nazar aati nahin
Is nigah-e-naaz ki baatein banane ki kaho
Dastan woh thi jise dil bujhte bujhte keh gaya
Shama-e-bazm-e-zindagi ke jhilmilane ki kaho
Kuchh dil-e-marhoom ki baatein karo ae ahl-e-ilm
Jis se veerane the aabad us deewane ki kaho
Dastan-e-zindagi bhi kis qadar dilchasp hai
Jo azal se chhid gaya hai us fasane ki kaho
Yeh fasoon-e-neem-e-shab yeh khwab-samaan khamoshi
Samari-fan aankh ke jadoo jagane ki kaho
Koi kya khaaye ga yun sacchi qasam jhooti qasam
Is nigah-e-naaz ki saugandh khane ki kaho
Shaam hi se gosh bar awaaz hai bazm-e-sukhan
Kuchh Firaq apni sunao kuchh zamane ki kaho