ہر نالہ ترے درد سے اب اور ہی کچھ ہے — فراق گورکھپوری
شاعر
ہر نالہ ترے درد سے اب اور ہی کچھ ہے
ہر نالہ ترے درد سے اب اور ہی کچھ ہے
ہر نغمہ سر بزم طرب اور ہی کچھ ہے
ارباب وفا جان بھی دینے کو ہیں تیار
ہستی کا مگر حسن طلب اور ہی کچھ ہے
یہ کام نہ لے نالہ و فریاد و فغاں سے
افلاک الٹ دینے کا ڈھب اور ہی کچھ ہے
اک سلسلۂ راز ہے جینا کہ ہو مرنا
جب اور ہی کچھ تھا مگر اب اور ہی کچھ ہے
کچھ مہر قیامت ہے نہ کچھ نار جہنم
ہشیار کہ وہ قہر و غضب اور ہی کچھ ہے
مذہب کی خرابی ہے نہ اخلاق کی پستی
دنیا کے مصائب کا سبب اور ہی کچھ ہے
بیہودہ سری سجدے میں ہے جان کھپانا
آئین محبت میں ادب اور ہی کچھ ہے
کیا حسن کے انداز تغافل کی شکایت
پیمان وفا عشق کا جب اور ہی کچھ ہے
دنیا کو جگا دے جو عدم کو بھی سلا دے
سنتے ہیں کہ وہ روز وہ شب اور ہی کچھ ہے
آنکھوں نے فراقؔ آج نہ پوچھو جو دکھایا
جو کچھ نظر آتا ہے وہ سب اور ہی کچھ ہے
Har nala tere dard se ab aur hi kuch hai
Har nala tere dard se ab aur hi kuch hai
Har naghma sar-e-bazm-e-tarab aur hi kuch hai
Arbaab-e-wafa jaan bhi dene ko hain tayyar
Hasti ka magar husn-e-talab aur hi kuch hai
Yeh kaam na le nala-o-faryaad-o-fughaan se
Aflak ulat dene ka dhab aur hi kuch hai
Ek silsila-e-raaz hai jeena ke ho marna
Jab aur hi kuch tha magar ab aur hi kuch hai
Kuchh mehr-e-qayamat hai na kuchh naar-e-jahannum
Hoshiyaar ke wo qahr-o-ghazab aur hi kuch hai
Mazhab ki kharabi hai na akhlaq ki pasti
Duniya ke masaib ka sabab aur hi kuch hai
Behuda sari sajde mein hai jaan khapana
Aaeen-e-mohabbat mein adab aur hi kuch hai
Kya husn ke andaaz-e-taghaful ki shikayat
Paiman-e-wafa ishq ka jab aur hi kuch hai
Duniya ko jaga de jo adam ko bhi sula de
Sunte hain ke wo roz wo shab aur hi kuch hai
Aankhon ne Firaq! aaj na poocho jo dikhaya
Jo kuch nazar aata hai wo sab aur hi kuch hai