تمہیں کیوں کر بتائیں زندگی کو کیا سمجھتے ہیں — فراق گورکھپوری
شاعر
تمہیں کیوں کر بتائیں زندگی کو کیا سمجھتے ہیں
تمہیں کیوں کر بتائیں زندگی کو کیا سمجھتے ہیں
سمجھ لو سانس لینا خودکشی کرنا سمجھتے ہیں
کسی بدمست کو راز آشنا سب کا سمجھتے ہیں
نگاہ یار تجھ کو کیا بتائیں کیا سمجھتے ہیں
بس اتنے پر ہمیں سب لوگ دیوانہ سمجھتے ہیں
کہ اس دنیا کو ہم اک دوسری دنیا سمجھتے ہیں
کہاں کا وصل تنہائی نے شاید بھیس بدلا ہے
ترے دم بھر کے مل جانے کو ہم بھی کیا سمجھتے ہیں
امیدوں میں بھی ان کی ایک شان بے نیازی ہے
ہر آسانی کو جو دشوار ہو جانا سمجھتے ہیں
یہی ضد ہے تو خیر آنکھیں اٹھاتے ہیں ہم اس جانب
مگر اے دل ہم اس میں جان کا کھٹکا سمجھتے ہیں
کہیں ہوں تیرے دیوانے ٹھہر جائیں تو زنداں ہے
جدھر کو منہ اٹھا کر چل پڑے صحرا سمجھتے ہیں
جہاں کی فطرت بیگانہ میں جو کیف غم بھر دیں
وہی جینا سمجھتے ہیں وہی مرنا سمجھتے ہیں
ہمارا ذکر کیا ہم کو تو ہوش آیا محبت میں
مگر ہم قیس کا دیوانہ ہو جانا سمجھتے ہیں
نہ شوخی شوخ ہے اتنی نہ پرکار اتنی پرکاری
نہ جانے لوگ تیری سادگی کو کیا سمجھتے ہیں
بھلا دیں ایک مدت کی جفائیں اس نے یہ کہہ کر
تجھے اپنا سمجھتے تھے تجھے اپنا سمجھتے ہیں
یہ کہہ کر آبلہ پا روندتے جاتے ہیں کانٹوں کو
جسے تلووں میں کر لیں جذب اسے صحرا سمجھتے ہیں
یہ ہستی نیستی سب موج خیزی ہے محبت کی
نہ ہم قطرہ سمجھتے ہیں نہ ہم دریا سمجھتے ہیں
فراقؔ اس گردش ایام سے کب کام نکلا ہے
سحر ہونے کو بھی ہم رات کٹ جانا سمجھتے ہیں
Tumhein kyun kar bataein zindagi ko kya samajhte hain
Tumhein kyun kar bataein zindagi ko kya samajhte hain
Samajh lo saans lena khudkushi karna samajhte hain
Kisi badmast ko raaz-aashna sab ka samajhte hain
Nigah-e-yaar tujhe kya bataein kya samajhte hain
Bas itne par hamein sab log deewana samajhte hain
Ke us duniya ko hum ek doosri duniya samajhte hain
Kahan ka vasl tanhai ne shayad bhes badla hai
Tere dam bhar ke mil jaane ko hum bhi kya samajhte hain
Umeedon mein bhi unki ek shaan-e-be-niyazi hai
Har aasani ko jo dushwaar ho jaana samajhte hain
Yehi zid hai to khair aankhein uthate hain hum is jaanib
Magar aye dil hum is mein jaan ka khatka samajhte hain
Kahin hon tere deewane thehar jaayen to zindan hai
Jidhar ko munh utha kar chal pade sehra samajhte hain
Jahan ki fitrat-e-begana mein jo kaif-e-gham bhar dein
Wahi jeena samajhte hain wahi marna samajhte hain
Hamara zikr kya hum ko to hosh aaya mohabbat mein
Magar hum Qais ka deewana ho jaana samajhte hain
Na shokhi shokh hai itni na purkaar itni purkari
Na jaane log teri saadgi ko kya samajhte hain
Bhula dein ek muddat ki jafaaein usne yeh keh kar
Tujhe apna samajhte the tujhe apna samajhte hain
Yeh keh kar aabla-pa raundte jaate hain kaanton ko
Jise talwon mein kar lein jazb usay sehra samajhte hain
Yeh hasti neesti sab mauj-khezi hai mohabbat ki
Na hum qatra samajhte hain na hum darya samajhte hain
Firaq! is gardish-e-ayyam se kab kaam nikla hai
Sehar hone ko bhi hum raat kat jaana samajhte hain