حالت حال کے سبب حالت حال ہی گئی — جون ایلیا
شاعر
حالت حال کے سبب حالت حال ہی گئی
حالت حال کے سبب حالت حال ہی گئی
شوق میں کچھ نہیں گیا شوق کی زندگی گئی
تیرا فراق جان جاں عیش تھا کیا مرے لیے
یعنی ترے فراق میں خوب شراب پی گئی
تیرے وصال کے لیے اپنے کمال کے لیے
حالت دل کہ تھی خراب اور خراب کی گئی
اس کی امید ناز کا ہم سے یہ مان تھا کہ آپ
عمر گزار دیجیے عمر گزار دی گئی
ایک ہی حادثہ تو ہے اور وہ یہ کہ آج تک
بات نہیں کہی گئی بات نہیں سنی گئی
بعد بھی تیرے جان جاں دل میں رہا عجب سماں
یاد رہی تری یہاں پھر تری یاد بھی گئی
اس کے بدن کو دی نمود ہم نے سخن میں اور پھر
اس کے بدن کے واسطے ایک قبا بھی سی گئی
مینا بہ مینا مے بہ مے جام بہ جام جم بہ جم
ناف پیالے کی ترے یاد عجب سہی گئی
کہنی ہے مجھ کو ایک بات آپ سے یعنی آپ سے
آپ کے شہر وصل میں لذت ہجر بھی گئی
صحن خیال یار میں کی نہ بسر شب فراق
جب سے وہ چاندنا گیا جب سے وہ چاندنی گئی
Hālat-e-hāl ke sabab hālat-e-hāl hi gayi
Hālat-e-hāl ke sabab hālat-e-hāl hi gayi
Shauq mein kuch nahin gaya shauq ki zindagi gayi
Tera firāq jaan-e-jaan aish tha kya mere liye
Ya'ni tere firāq mein khoob sharāb pee gayi
Tere visāl ke liye apne kamāl ke liye
Hālat-e-dil ke thi kharab aur kharab ki gayi
Us ki ummeed-e-nāz ka hum se yeh maan tha ke aap
Umar guzār deejiye umar guzār di gayi
Ek hi hādisa toh hai aur woh yeh ke aaj tak
Baat nahin kahi gayi baat nahin suni gayi
Baad bhi tere jaan-e-jaan dil mein raha ajab samāñ
Yaad rahi teri yahaan phir teri yaad bhi gayi
Us ke badan ko di namood hum ne sukhan mein aur phir
Us ke badan ke waaste ek qabā bhi si gayi
Meena ba meena mai ba mai jaam ba jaam jam ba jam
Nāf piyāle ki tere yaad ajab seh gayi
Kehni hai mujh ko ek baat aap se ya'ni aap se
Aap ke shehr-e-wasl mein lazzat-e-hijr bhi gayi
Sehn-e-khayāl-e-yār mein ki na basar shab-e-firāq
Jab se woh chandnā gaya jab se woh chandni gayi
شاعر کے بارے میں
اردو ادب کی تاریخ میں بہت کم ایسی شخصیتیں گزری ہیں جن کی زندگی خود ایک صدی بھر کا موضوع ہو، اور جون ایلیا ان معدودے چند ناموں میں سے ایک ہیں۔ 14 دس...
مکمل تعارف پڑھیں