ہر دھڑکن ہیجانی تھی ہر خاموشی طوفانی تھی — جون ایلیا
شاعر
ہر دھڑکن ہیجانی تھی ہر خاموشی طوفانی تھی
ہر دھڑکن ہیجانی تھی ہر خاموشی طوفانی تھی
پھر بھی محبت صرف مسلسل ملنے کی آسانی تھی
جس دن اس سے بات ہوئی تھی اس دن بھی بے کیف تھا میں
جس دن اس کا خط آیا ہے اس دن بھی ویرانی تھی
جب اس نے مجھ سے یہ کہا تھا عشق رفاقت ہی تو نہیں
تب میں نے ہر شخص کی صورت مشکل سے پہچانی تھی
جس دن وہ ملنے آئی ہے اس دن کی روداد یہ ہے
اس کا بلاؤز نارنجی تھا اس کی ساری دھانی تھی
الجھن سی ہونے لگتی تھی مجھ کو اکثر اور وہ یوں
میرا مزاج عشق تھا شہری اس کی وفا دہقانی تھی
اب تو اس کے بارے میں تم جو چاہو وہ کہہ ڈالو
وہ انگڑائی میرے کمرے تک تو بڑی روحانی تھی
نام پہ ہم قربان تھے اس کے لیکن پھر یہ طور ہوا
اس کو دیکھ کے رک جانا بھی سب سے بڑی قربانی تھی
مجھ سے بچھڑ کر بھی وہ لڑکی کتنی خوش خوش رہتی ہے
اس لڑکی نے مجھ سے بچھڑ کر مر جانے کی ٹھانی تھی
عشق کی حالت کچھ بھی نہیں تھی بات بڑھانے کا فن تھا
لمحے لا فانی ٹھہرے تھے قطروں کی طغیانی تھی
جس کو خود میں نے بھی اپنی روح کا عرفاں سمجھا تھا
وہ تو شاید میرے پیاسے ہونٹوں کی شیطانی تھی
تھا دربار کلاں بھی اس کا نوبت خانہ اس کا تھا
تھی میرے دل کی جو رانی امروہے کی رانی تھی
Har dhaRkan hejāni thi har khamoshi toofāni thi
Har dhaRkan hejāni thi har khamoshi toofāni thi
Phir bhi mohabbat sirf musalsal milne ki āsāni thi
Jis din us se baat hui thi us din bhi be-kaif tha main
Jis din us ka khat aaya hai us din bhi veerāni thi
Jab us ne mujh se yeh kaha tha ishq rafāqat hi toh nahin
Tab main ne har shakhs ki soorat mushkil se pehchāni thi
Jis din woh milne aayi hai us din ki rūdād yeh hai
Us ka blouse nāranji tha us ki sāri dhāni thi
Uljhan si hone lagti thi mujh ko aksar aur woh yūn
Mera mizāj-e-ishq tha shehri us ki wafa dehqāni thi
Ab toh us ke baare mein tum jo chāho woh keh daalo
Woh angRāi mere kamre tak toh baRi rūhāni thi
Nāam pe hum qurbān the us ke lekin phir yeh taur hua
Us ko dekh ke ruk jaana bhi sab se baRi qurbāni thi
Mujh se bichhaR kar bhi woh laRki kitni khush-khush rehti hai
Us laRki ne mujh se bichhaR kar mar jaane ki thāni thi
Ishq ki hālat kuch bhi nahin thi baat baRhāne ka fan tha
Lamhe la-fani thehre the qataron ki tughyāni thi
Jis ko khud main ne bhi apni rūh ka irfān samjha tha
Woh toh shāyad mere pyaase honToñ ki shaitāni thi
Tha darbār-e-kalāñ bhi us ka naubat khāna us ka tha
Thi mere dil ki jo rāni Amrohe ki rāni thi
شاعر کے بارے میں
اردو ادب کی تاریخ میں بہت کم ایسی شخصیتیں گزری ہیں جن کی زندگی خود ایک صدی بھر کا موضوع ہو، اور جون ایلیا ان معدودے چند ناموں میں سے ایک ہیں۔ 14 دس...
مکمل تعارف پڑھیں