عورت — مجید امجد

Aurat

Tu prem mandir ki paak devi, tu husn ki mamlekat ki raani
Hayaat-e-insaan ki qismaton par teri nigahon ki hukmarani
Jahaan-e-ulfat teri qalamrau, hareem-e-dil teri rajdhani
Bahaar-e-fitrat tere lab-e-lal-goon ki dosheeza muskurahat
Nizam-e-konain teri aankhon ke surkh doron ki thartharahat
Farogh-e-sad-kainaat teri jabeen-e-seemeen ki zau-fishani
Bhadakte seenon mein bas rahi hain qarar ban kar teri adaein
Tarasti roohon ko jaam-e-ishrat pila rahi hain teri wafaein
Rag-e-jahan mein thirak rahi hai sharab ban kar teri jawani
Dimaagh-e-parwardigar mein jo azal ke din se machal raha tha
Zaban-e-takhleeq-e-dehr se bhi na jiska izhaar ho saka tha
Namood teri usi muqaddas haseen takhayyul ki tarjumani
Hai wadi-e-neel par tera abr-e-zulf saya-kunan abhi tak
Hain jaam-e-iraan ki mai mein tere labon ki sheeriniyan abhi tak
Fasana-go hai teri abhi tak hadees-e-yunan ki khoon-chakani
Hai teri ulfat ke raag par mauj-e-rood-e-ganga ko wajd ab tak
Teri muhabbat ki aag mein jal raha hai sahra-e-najd ab tak
Jamal-e-zahra tere malaik-faraib jalwon ki ik nishani
Teri nigahon ke seher se gul-fishaan hai sher-o-adab ki duniya
Tere tabassum ke kaif se hai yeh gham ki duniya, tarab ki duniya
Tere labon ki mithas se shakreen hai zehrab-e-zindagani
Tera tabassum kali kali mein, tera tarannum chaman chaman mein
Ramoz-e-hasti ke pech-o-kham tere gesuon ki shikan shikan mein
Kitab-e-tareekh-e-zindagi ke waraq waraq par teri kahani
Jo tu na hoti toh yun darakhshanda shama-e-bazm-e-jahan na hoti
Wujood-e-arz-o-sama na hota, namood-e-kaun-o-makaan na hoti
Bashar ki mahdoodiyat ki khatir tarasti aalam ki be-karani