بس سٹینڈ پر — مجید امجد

Bus Stand Par

Khudaya ab ke yeh kaisi bahar aayi
Khuda se kya gila bhai
Khuda toh khair kis ne iska aks-e-naqsh-e-pa dekha
Na dekha toh bhi dekha aur dekha bhi toh kya dekha
Magar tauba meri tauba yeh insaan bhi toh aakhir ik tamasha hai
Yeh jisne pichhli taangon par khada hona bade jatnon se seekha hai
Abhi kal tak jab uske abruon tak moye-e-peechaan the
Abhi kal tak jab uske hont mehroom-e-zanakdaan the
Radaa-e-sad zamaan odhe larazta kaanpta baitha
Zameer-e-sang se bas ek chingari ka talib tha
Magar ab toh yeh oonchi mumtiyon waale jalwa khanon mein basta hai
Hamare hi labon se muskurahat chheen kar ab ham pe hansta hai
Khuda uska, Khudai uski, har shai uski, hum kya hain
Chamakti motoron se udne waali dhool ka nacheez zarra hain
Hamari hi tarah jo paayemaal-e-satwat-e-meeri o shahi mein
Lakhokha aab-dida, pa-piyada, dil-zada, waamanda raahi hain
Jinhein nazron se gum hote hue raston ki gum-paima lakeeron mein
Dikhayi de rahi hain aane waali manzilon ki dhundli tasveerein
Zaroor ek roz badlega nizam-e-qismat-e-adam
Basegi ik nayi duniya sajega ik naya aalam
Shabistan mein nayi shamaein, gulistan mein naya mausam
Woh rut aye humnasf, jaane kab aayegi
Woh fasl-e-dair-ras, jaane kab aayegi
Yeh nau number ki bus, jaane kab aayegi