دستک — مجید امجد

Dastak

Kis ne darwaza khatkhataya hai
Ja ke dekhun toh kaun aaya hai
Kaun aaya hai mere dware par
Raat aayi kahan bechare par
Mere chhappar se tek kar kandha
Kaun istada hai thaka maanda
Meri kutiya mein aao sasta lo
Yeh mera saaghar-e-shikasta lo
Meri chhaghal se ghoont paani piyo
Ek naye azm ki jawani piyo
Timtimate diye ki jhilmil mein
Jot sulga lo ek nayi dil mein
Yeh mere aansuon ki shabnam lo
Paon ke aablon ki marham lo
Yeh mujhe iftekhaar do, baitho
Sar se gathri utar do, baitho
Mere zaanu par apna sar rakh kar
Taaq par kaahish-e-safar rakh kar
Neend ki anjuman mein kho jao
Manzilon ke sapnon mein kho jao
Khwab wadi-o-kohsar ke khwab
Dasht-o-darya-o-aabshar ke khwab
Khwab andheri taweel rahon ke
Kunj-e-sehra ki khaima-gahon ke
Jahan ek shama abhi farozan hai
Jahan ek dil tapān hai sozān hai
Tum lipat jao un khayalon se
Aur main khelun tumhare baalon se
Subh jab noor ka fasoon barse
Soni pagdandiyon pe khoon barse
Baag thame haseen iradon ki
Tum khabar lo phir apne jaadon ki
Jab talak zeest ka safeena bahe
Ajnabi ajnabi ko yaad rahe
Mujhko yeh apni yaad de jao
Aao bhi kyun jhijkte ho aao
Tum kahan ho kahan jawab toh do
O mere mehmaan jawab toh do
Tum ne darwaza khatkhataya tha
Kis ki dastak thi kaun aaya tha
Neem shab qaafle sitaron ke
Tez harkare abr paaron ke
Kis ne neendon ko meri toka tha
Koi jhonka tha koi dhoka tha