ایک شبیہ — مجید امجد

Ek Shabeeh

Kuch dinon se qareeb-e-dil hai woh din
Jab achaanak isi jagah ik shakal
Meri aankhon mein muskurayi thi
Ek pal ke liye to ek woh shakal
Jaane kya kuch thi jhoot bhi sach bhi
Shaayad ik bhool shaayad ik pehchaan
Kuch dinon se to jaan boojh ke ab
Yeh samajhne laga hoon main hi to hoon
Jis ki khaatir yeh aks ubhra hai
Kuch dinon se to ab main daanista
Is gumaan ka fareb khaata hoon
Roz ik shakal us doraahe par
Ab mera intezaar karti hai
Ek deewar se lagi har subah
Tuk-tuki baandhe neem rukh yaksu
Ab mera intezaar karti hai
Main guzarta hoon mujh ko dekhti hai
Main nahin dekhta woh dekhti hai
Us ke chehre ki saakht sa'at-e-deed
Zard honton ki patriyan peetal
Surkh aankhon ki tukdiyan qirmiz
Raughani dhoop mein dhanste hue paon
Muntazir muntazir udaas udaas
Ik yehi chehra ek pal ke liye
Jaane kya kuch tha lekin ab to mujhe
Apni yeh bhool bhoolti hi nahin
Ek din yeh shabeeh dekhi thi
Kuch dinon se qareeb-e-dil hai woh din
Kuch dinon se to beet'te hue din
Isi ik din mein dhalte jaate hain
Din guzarte hain ab to yun jaise
Umar us din ka ik hissa hai
Umar guzri yeh din nahin guzra
Jis taraf jaaun jis taraf dekhun
Mujh se ojhal bhi mere saamne bhi
Shakal ik teen ke waraq pe rahi
Shakal ik dil ke chaukhat'te mein rahi