امروز — مجید امجد

Imroz

Abad ke samundar kī ik mauj jis par merī zindagī kā kañwal tairtā hai
Kisī un sunī dā'imī rāginī kī koī tān āzurda āwāra barbād
Jo dam bhar ko aa kar merī uljhī uljhī sī sāñsoñ ke sañgeet mein ḍhal ga'ī hai
Zamāne kī phailī hu'ī be-karāñ wus'atõ mein yeh do chār lamhoñ kī mī'ād
Tulū-o-g̠hurūb-e-mah-o-mehr ke jāvedānī tasalsul kī do chār kaṛiyāñ
Yeh kuchh thartharāte ujāloñ kā romān yeh kuchh sansanāte andheroñ kā qissa
Yeh jo kuchh ke mere zamāne mein hai aur yeh jo kuchh ke us ke zamāne mein maiñ hūñ
Yahī merā hissa azal se abad ke ḳhazānoñ se hai bas yahī merā hissa
Mujhe kyā ḳhabar waqt ke devtā kī haseen rath ke pahiyoñ tale pas chuke hain
Muqaddar ke kitne khilaune zamānoñ ke hangāme sadiyoñ ke sad-hā hayūle
Mujhe kyā ta'alluq merī āḳhirī sāñs ke ba'd bhī dosh-e-geetī pe machle
Mah-o-sāl ke lā-zawāl ābshār-e-ravāñ kā woh āñchal jo tāroñ ko chhu le
Magar āh yeh lamha-e-muḳhtasar jo merī zindagī merā zād-e-safar hai
Mere sāth hai mere bas mein hai merī hathelī pe hai yeh labā-lab piyāla
Yahī kuchh hai le de ke mere liye is ḳharābāt-e-shām-o-sahar mein yahī kuchh
Yeh ik muhlat-e-kāwish-e-dard-e-hastī yeh ik fursat-e-koshish-e-āh-o-nāla
Yeh sahbā-e-imroz jo subah kī shehzādī kī mast añkhiṛiyoñ se ṭapak kar
Ba-daur-e-hayāt aa ga'ī hai yeh nanhī sī chiṛiyāñ jo chhat mein chahakne lagī hain
Hawā kā yeh jhoñkā jo mere darīche mein tulsī kī ṭahnī ko larzā gayā hai
Paṛosan ke āñgan mein pānī ke nalke pe yeh chooṛiyāñ jo chhanke lagī hain
Yeh dunyā-e-imroz merī hai mere dil-e-zār kī dhaṛkanoñ kī amīñ hai
Yeh ashkoñ se shādāb do chār subheiñ yeh āhoñ se ma'mūr do chār shāmeiñ
Unhīñ chilmanoñ se mujhe dekhnā hai woh jo kuchh ke nazroñ kī zad mein nahīñ hai