جن لفظوں میں — مجید امجد
شاعر
جن لفظوں میں
جن لفظوں میں ہمارے دلوں کی بیعتیں ہیں کیا صرف وہ لفظ ہمارے کچھ بھی نہ کرنے
کا کفارہ بن سکتے ہیں
کیا کچھ چیختے معنوں والی سطریں سہارا بن سکتی ہیں ان کا
جن کی آنکھوں میں اس دیس کی حد ان ویراں صحنوں تک ہے
کیسے یہ شعر اور کیا ان کی حقیقت
نا صاحب اس اپنے لفظوں بھرے کنستر سے چلو بھر کر بھیک کسی کو دے کر
ہم سے اپنے قرض نہیں اتریں گے
اور یہ قرض اب تک کس سے اور کب اترے ہیں
لاکھوں نصرت مند ہجوموں کی خنداں خنداں خونیں آنکھوں سے بھرے ہوئے
تاریخ کے چوراہوں پر
صاحب تخت خداوندوں کی کٹتی گردنیں بھی حل کر نہ سکیں یہ مسائل
اک سائل کے مسائل
اپنے اپنے عروجوں کی افتادگیوں میں ڈوب گئیں سب تہذیبیں سب فلسفے۔۔۔
تو اب یہ سب حرف زبوروں میں جو مجلد ہیں کیا حاصل ان کا۔۔۔
جب تک میرا یہ دکھ خود میرے لہو کی دھڑکتی ٹکسالوں میں ڈھل کے دعاؤں بھری اس اک
میلی جھولی میں نہ کھنکے
جو رستے کے کنارے مرے قدموں پہ بچھی ہے
Jin Lafzon Mein
Jin lafzon mein hamare dilon ki bai'atein hain kya sirf woh lafz hamare kuch bhi na karne
ka kaffara ban sakte hain
Kya kuch cheekhte maanon wali satrein sahara ban sakti hain in ka
Jin ki aankhon mein is des ki hadd un veeran sahnon tak hai
Kaise yeh sher aur kya in ki haqeeqat
Na sahib is apne lafzon bhare kanastar se chullu bhar kar bheek kisi ko de kar
Hum se apne qarz nahin utrengay
Aur yeh qarz ab tak kis se aur kab utre hain
Lakhon nusrat mand hujoomon ki khandan khandan khooni aankhon se bhare hue
Tareekh ke chaurahon par
Sahib-e-takht khuda-wandon ki katti gardanein bhi hal kar na sakein yeh masail
Ek saail ke masail
Apne apne uroojon ki iftadeegiyon mein doob gayin sab tehzeebein sab falsafe....
Toh ab yeh sab harf zabooron mein jo mujallad hain kya haasil in ka....
Jab tak mera yeh dukh khud mere lahu ki dhadakti taksalon mein dhal ke duaon bhari is ek
maili jholi mein na khanke
Jo raste ke kinare mere qadmon pe bichhi hai
شاعر کے بارے میں
مجید امجد (29 جون 1914 – 11 مئی 1974) اردو کے نمایاں شاعر اور فلسفیانہ سوچ کے حامل ادبی شخصیت ہیں۔ وہ جھنگ، پنجاب میں پیدا ہوئے اور ابتدائی تعلیم ا...
مکمل تعارف پڑھیں