ریڈنگ روم — مجید امجد

Reading Room

Mez par akhbar ke phaile waraq
Bikhre bikhre tehre tehre chak chak
Dhal gayi hai qaalib-e-alfaz mein
Seena-e-hasti ki aah-e-dardnak
Paas hi deewar ko teke hue
Radio garam-sukhan mahv-e-bayan
Cheekhti hain jam'a aawaz mein
Khoon ke cheente lahoo ki boondiyan
Sham reading room ki maghmoom sham
Chand kaan elaan-chi ki baat par
Chand aankhein soch mein doobi hui
Murtakaz akhbar ke safhaat par
Ek kamre mein simat kar aa gaye
Kitne dukhdon ke sada-paikar haroof
Kitne dardon ke mistar-e-zamzame
Kitne andhe gyani behre philosopher
Phir bhi kuch idraak mein aata nahin
Kya hai raqs-e-gardish-e-ayyam kya
Ek shikasta naao ek khooni bhanwar
Kya hai is afsane ka anjaam kya
Yeh mufakkir kuch samajh sakte nahin
Chhat ke neeche rozanon ke darmiyan
Gol gol aankhon ke andar mahv-e-deed
Kaale paare ki marqas putliyan
Kaash yeh hairan kabootar jaante
Khufta hai in kaghazon ki satah par
Kitne phunakte ashiyanon ka dhuan
Kitne nakhcheeron ki aahon ke sharar
Hain in aawazon ke andar par-kusha
Kitne kargas jin ko murdaron ki boo
Kheench laayi hai sar-e-deewar-e-bagh
Chhat ke neeche muztarib nazara khu
Fikr-mand aankhon mein hairan putliyan
Yeh kabootar dekhte thakte nahin
Dekhte hain sochte hain kya karein
Yeh mufakkir kuch samajh sakte nahin