ریوڑ — مجید امجد
شاعر
ریوڑ
شام کی راکھ میں لتھڑی ہوئی ڈھلوانوں پر
ایک ریوڑ کے تھکے قدموں کا مدھم آہنگ
جس کی ہر لہر دھندلکوں میں لڑھک جاتی ہے
مست چرواہا چراگاہ کی اک چوٹی سے
جب اترتا ہے تو زیتون کی لانبی سونٹی
کسی جلتی ہوئی بدلی میں اٹک جاتی ہے
بکریاں دشت کی مہکار میں گوندھا ہوا دودھ
چھاگلوں میں لیے جب رقص کناں آتی ہیں
کوئی چوڑی خم دوراں پہ چھنک جاتی ہے
جست بھرتی ہے کبھی اور کبھی چلتے چلتے
ناچتی ڈار ممکتے ہوئے بزغالوں کی
ہر جھکی شاخ کی چوکھٹ پہ ٹھٹک جاتی ہے
سان پر لاکھ چھری سیخ پہ صد پارہ گوشت
پھر بھی مدہوش غزالوں کی یہ ٹولی ہے کہ جو
بار بار اپنے خط رہ سے بھٹک جاتی ہے
شام کی راکھ میں لتھڑی ہوئی ڈھلوانوں پر
کھیلتی ہے غم ہستی کی وہ شاداں سی امنگ
جس کی رو وقت کی پہنائیوں تک جاتی ہے
Revad
Shaam ki raakh mein lathdi hui dhalwanon par
Ek revad ke thake qadmon ka madham aahang
Jis ki har lahar dhundlakon mein ludhak jaati hai
Mast charwaha charagah ki ik choti se
Jab utarta hai to zaitoon ki laambi sonti
Kisi jalti hui badli mein atak jaati hai
Bakriyan dasht ki mahkaar mein goondha hua doodh
Chhagloun mein liye jab raqs kunaan aati hain
Koi chori khum dauraan pe chhanak jaati hai
Jast bharti hai kabhi aur kabhi chalte chalte
Naachti daar mamakte hue bazghalon ki
Har jhuki shaakh ki chaukhat pe thithak jaati hai
Saan par laakh chhuri seekh pe sad paara gosht
Phir bhi madhosh ghazalon ki yeh toli hai ke jo
Baar baar apne khatt-e-rah se bhatak jaati hai
Shaam ki raakh mein lathdi hui dhalwanon par
Khelati hai gham-e-hasti ki woh shaadaan si umang
Jis ki rau waqt ki pahnaaiyon tak jaati hai
شاعر کے بارے میں
مجید امجد (29 جون 1914 – 11 مئی 1974) اردو کے نمایاں شاعر اور فلسفیانہ سوچ کے حامل ادبی شخصیت ہیں۔ وہ جھنگ، پنجاب میں پیدا ہوئے اور ابتدائی تعلیم ا...
مکمل تعارف پڑھیں