جب تک دہان زخم نہ پیدا کرے کوئی
جب تک دہان زخم نہ پیدا کرے کوئی مشکل کہ تجھ سے راہ سخن وا کرے کوئی عالم غبار وحشت مجنوں ہے سر بہ سر کب تک خیال طرۂ لیلا کرے کوئی افسردگی نہیں طرب انشائے التفات ہاں درد بن کے دل میں مگر جا کرے کوئی رونے سے اے ندیم ملامت نہ کر مجھے آخر کبھی تو عقدۂ دل وا کرے کوئی چاک جگر سے جب رہ پرسش نہ وا ہوئی کیا فائدہ کہ جیب کو رسوا کرے کوئی لخت جگر سے ہے رگ ہر خار شاخ گل تا چند باغبانی صحرا کرے کوئی ناکامی نگاہ ہے برق نظارہ سوز تو وہ نہیں کہ تجھ کو تماشا کرے کوئی ہر سنگ و خشت ہے صدف گوہر شکست نقصاں نہیں جنوں سے جو سودا کرے کوئی سر بر ہوئی نہ وعدۂ صبر آزما سے عمر فرصت کہاں کہ تیری تمنا کرے کوئی ہے وحشت طبیعت ایجاد یاس خیز یہ درد وہ نہیں کہ نہ پیدا کرے کوئی بیکاری جنوں کو ہے سر پیٹنے کا شغل جب ہاتھ ٹوٹ جائیں تو پھر کیا کرے کوئی حسن فروغ شمع سخن دور ہے اسدؔ پہلے دل گداختہ پیدا کرے کوئی وحشت کہاں کہ بے خودی انشا کرے کوئی ہستی کو لفظ معنی عنقا کرے کوئی جو کچھ ہے محو شوخی ابروئے یار ہے آنکھوں کو رکھ کے طاق پہ دیکھا کرے کوئی عرض سرشک پر ہے فضاۓ زمانہ تنگ صحرا کہاں کہ دعوت دریا کرے کوئی وہ شوخ اپنے حسن پہ مغرور ہے اسدؔ دکھلا کے اس کو آئنہ توڑا کرے کوئی
English rendering
Jab tak dahan-e-zakhm na paida kare koi Mushkil ke tujh se rah-e-sukhan va kare koi Aalam ghubar-e-wahshat-e-Majnun hai sar-ba-sar Kab tak khayal-e-turra-e-Laila kare koi Afsurdagi nahin tarab-e-inshaa-e-iltifat Haan dard ban ke dil mein magar ja kare koi Rone se ae Nadeem malamat na kar mujhe Aakhir kabhi to uqda-e-dil va kare koi Chak-e-jigar se jab rah-e-pursish na hui Kya faida ke jaib ko ruswa kare koi Lakht-e-jigar se hai rag-e-har khaar-e-shakh-e-gul Ta chand baghbani-e-sahra kare koi Na-kami-e-nigah hai barq-e-nazara-soz Tu wo nahin ke tujh ko tamasha kare koi Har sang-o-khisht hai sadaf-e-gauhar-e-shikast Nuqsan nahin junoon se jo sauda kare koi Sar-bar hui na va'ada-e-sabr-aazma se umar Fursat kahan ke teri tamanna kare koi Hai wahshat-e-tabiyat-e-eejad-e-yaas-khez Yeh dard wo nahin ke na paida kare koi Bekari-e-junoon ko hai sar peetne ka shughl Jab haath toot jaen to phir kya kare koi Husn-e-farogh-e-sham'a-e-sukhan door hai Asadؔ Pehle dil-e-gudakhta paida kare koi Wahshat kahan ke be-khudi insha kare koi Hasti ko lafz-e-ma'ni-e-Anqa kare koi Jo kuch hai mahv-e-shokhi-e-abroo-e-yaar hai Aankhon ko rakh ke taaq pe dekha kare koi Arz-e-sarishk par hai faza-e-zamana tang Sahra kahan ke da'wat-e-darya kare koi Wo shokh apne husn pe maghrur hai Asadؔ Dikha ke us ko aaina toda kare koi