سب کہاں کچھ لالہ و گل میں نمایاں ہو گئیں
سب کہاں کچھ لالہ و گل میں نمایاں ہو گئیں خاک میں کیا صورتیں ہوں گی کہ پنہاں ہو گئیں یاد تھیں ہم کو بھی رنگا رنگ بزم آرائیاں لیکن اب نقش و نگار طاق نسیاں ہو گئیں تھیں بنات النعش گردوں دن کو پردے میں نہاں شب کو ان کے جی میں کیا آئی کہ عریاں ہو گئیں قید میں یعقوب نے لی گو نہ یوسف کی خبر لیکن آنکھیں روزن دیوار زنداں ہو گئیں سب رقیبوں سے ہوں نا خوش پر زنان مصر سے ہے زلیخا خوش کہ محو ماہ کنعاں ہو گئیں جوئے خوں آنکھوں سے بہنے دو کہ ہے شام فراق میں یہ سمجھوں گا کہ شمعیں دو فروزاں ہو گئیں ان پری زادوں سے لیں گے خلد میں ہم انتقام قدرت حق سے یہی حوریں اگر واں ہو گئیں نیند اس کی ہے دماغ اس کا ہے راتیں اس کی ہیں تیری زلفیں جس کے بازو پر پریشاں ہو گئیں میں چمن میں کیا گیا گویا دبستاں کھل گیا بلبلیں سن کر مرے نالے غزل خواں ہو گئیں وہ نگاہیں کیوں ہوئی جاتی ہیں یارب دل کے پار جو مری کوتاہیٔ قسمت سے مژگاں ہو گئیں بسکہ روکا میں نے اور سینے میں ابھریں پے بہ پے میری آہیں بخیۂ چاک گریباں ہو گئیں واں گیا بھی میں تو ان کی گالیوں کا کیا جواب یاد تھیں جتنی دعائیں صرف درباں ہو گئیں جاں فزا ہے بادہ جس کے ہاتھ میں جام آ گیا سب لکیریں ہاتھ کی گویا رگ جاں ہو گئیں ہم موحد ہیں ہمارا کیش ہے ترک رسوم ملتیں جب مٹ گئیں اجزائے ایماں ہو گئیں رنج سے خوگر ہوا انساں تو مٹ جاتا ہے رنج مشکلیں مجھ پر پڑیں اتنی کہ آساں ہو گئیں یوں ہی گر روتا رہا غالبؔ تو اے اہل جہاں دیکھنا ان بستیوں کو تم کہ ویراں ہو گئیں
English rendering
Sab kahan kuchh lala-o-gul mein numayan ho gayin Khak mein kya suratein hongi ke pinhan ho gayin Yaad thin ham ko bhi ranga-rang bazm-aaraaiyan Lekin ab naqsh-o-nigar-e-taq-e-nisyan ho gayin Thin banat-un-nash-e-gardoon din ko parde mein nihan Shab ko un ke jee mein kya aayi ke uriyan ho gayin Qaid mein Yaqoob ne li go na Yusuf ki khabar Lekin aankhein rozen-e-diwar-e-zindan ho gayin Sab raqeebon se hoon na-khush par zanan-e-Misr se Hai Zulaikha khush ke mahw-e-mah-e-Kanaan ho gayin Joo-e-khoon aankhon se bahne do ke hai sham-e-firaq Main ye samjhunga ke sham'ein do furozan ho gayin Un pari-zadon se lenge khuld mein ham intiqam Qudrat-e-Haq se yehi hoorein agar waan ho gayin Neend us ki hai, dimagh us ka hai, raatein us ki hi hain Teri zulfein jis ke bazoo par pareshan ho gayin Main chaman mein kya gaya goya dabistan khul gaya Bulbulein sun kar mere nale ghazal-khwan ho gayin Wo nigahein kyun hui jati hain Ya Rab dil ke paar Jo meri kotahi-e-qismat se muzhgan ho gayin Bas ke roka main ne aur seene mein ubhrein pay ba pay Meri aahein bakhiya-chak-e-gireban ho gayin Waan gaya bhi main to un ki galiyon ka kya jawab Yaad thin jitni dua'ein sarf-e-darban ho gayin Jan-faza hai baada jis ke hath mein jam aa gaya Sab lakeerein hath ki goya rag-e-jan ho gayin Ham muwahhid hain, hamara kesh hai tark-e-rusoom Millatein jab mit gayin ajza-e-eeman ho gayin Ranj se khugar hua insan to mit jata hai ranj Mushkilein mujh par padein itni ke aasan ho gayin Yun hi gar rota raha Ghalib to aye ahl-e-jahan Dekhna un bastiyon ko tum ke veeran ho gayin