ستائش گر ہے زاہد اس قدر جس باغ رضواں کا
ستائش گر ہے زاہد اس قدر جس باغ رضواں کا وہ اک گلدستہ ہے ہم بے خودوں کے طاق نسیاں کا بیاں کیا کیجیے بیداد کاوش ہائے مژگاں کا کہ ہر یک قطرۂ خوں دانہ ہے تسبیح مرجاں کا نہ آئی سطوت قاتل بھی مانع میرے نالوں کو لیا دانتوں میں جو تنکا ہوا ریشہ نیستاں کا دکھاؤں گا تماشا دی اگر فرصت زمانے نے مرا ہر داغ دل اک تخم ہے سرو چراغاں کا کیا آئینہ خانے کا وہ نقشہ تیرے جلوے نے کرے جو پرتو خورشید عالم شبنمستاں کا مری تعمیر میں مضمر ہے اک صورت خرابی کی ہیولیٰ برق خرمن کا ہے خون گرم دہقاں کا اگا ہے گھر میں ہر سو سبزہ ویرانی تماشا کر مدار اب کھودنے پر گھاس کے ہے میرے درباں کا خموشی میں نہاں خوں گشتہ لاکھوں آرزوئیں ہیں چراغ مردہ ہوں میں بے زباں گور غریباں کا ہنوز اک پرتو نقش خیال یار باقی ہے دل افسردہ گویا حجرہ ہے یوسف کے زنداں کا بغل میں غیر کی آج آپ سوتے ہیں کہیں ورنہ سبب کیا خواب میں آ کر تبسم ہائے پنہاں کا نہیں معلوم کس کس کا لہو پانی ہوا ہوگا قیامت ہے سرشک آلودہ ہونا تیری مژگاں کا نظر میں ہے ہماری جادۂ راہ فنا غالبؔ کہ یہ شیرازہ ہے عالم کے اجزائے پریشاں کا
English rendering
Sitaishgar hai zahid is qadar jis bagh-e-rizwan ka Wo ek guldasta hai ham be-khudon ke taq-e-nisyan ka Bayan kya kijiye bedad-e-kawish-hay-e-muzhgan ka Ke har yak qatra-e-khoon dana hai tasbeeh-e-marjan ka Na aayi satwat-e-qatil bhi maney mere nalon ko Liya danton mein jo tinka hua resha-e-naistan ka Dikhunga tamasha di agar fursat zamane ne Mera har dagh-e-dil ek tukhm hai sarv-e-chiraghan ka Kya aaina-khana ka wo naqsha tere jalwe ne Kare jo partaw-e-khursheed-e-alam-e-shabnamistan ka Meri tameer mein muzmar hai ek surat-e-kharabi ki Hiyoola barq-e-khirman ka hai khoon-e-garm-e-dehqan ka Uga hai ghar mein har soo sabza-e-veerani tamasha kar Madar ab khodne par ghas ke hai mere darban ka Khamoshi mein nihan khoon-gushta lakhon aarzoo'ein hain Charagh-e-murda hoon main be-zaban-e-gor-e-ghareeban ka Hunooz ek partaw-e-naqsh-e-khayal-e-yar baqi hai Dil-e-afsarda goya hujra hai Yusuf ke zindan ka Baghal mein ghair ki aaj aap sote hain kahin warna Sabab kya khwab mein aa kar tabassum-hay-e-pinhan ka Nahin maloom kis kis ka lahoo pani hua hoga Qiyamat hai sarashk-alooda hona teri muzhgan ka Nazar mein hai hamari jada-e-rah-e-fana Ghalib Ke ye shiraza hai alam ke ajza-e-pareshan ka