یہ نہ تھی ہماری قسمت کہ وصال یار ہوتا
یہ نہ تھی ہماری قسمت کہ وصال یار ہوتا اگر اور جیتے رہتے یہی انتظار ہوتا ترے وعدے پر جیے ہم تو یہ جان جھوٹ جانا کہ خوشی سے مر نہ جاتے اگر اعتبار ہوتا تری نازکی سے جانا کہ بندھا تھا عہد بودا کبھی تو نہ توڑ سکتا اگر استوار ہوتا کوئی میرے دل سے پوچھے ترے تیر نیم کش کو یہ خلش کہاں سے ہوتی جو جگر کے پار ہوتا یہ کہاں کی دوستی ہے کہ بنے ہیں دوست ناصح کوئی چارہ ساز ہوتا کوئی غم گسار ہوتا رگ سنگ سے ٹپکتا وہ لہو کہ پھر نہ تھمتا جسے غم سمجھ رہے ہو یہ اگر شرار ہوتا غم اگرچہ جاں گسل ہے پہ کہاں بچیں کہ دل ہے غم عشق گر نہ ہوتا غم روزگار ہوتا کہوں کس سے میں کہ کیا ہے شب غم بری بلا ہے مجھے کیا برا تھا مرنا اگر ایک بار ہوتا ہوئے مر کے ہم جو رسوا ہوئے کیوں نہ غرق دریا نہ کبھی جنازہ اٹھتا نہ کہیں مزار ہوتا اسے کون دیکھ سکتا کہ یگانہ ہے وہ یکتا جو دوئی کی بو بھی ہوتی تو کہیں دو چار ہوتا یہ مسائل تصوف یہ ترا بیان غالبؔ تجھے ہم ولی سمجھتے جو نہ بادہ خوار ہوتا
English rendering
Yeh na thi hamari qismat ki visal-e-yaar hota Agar aur jeete rehte yehi intezar hota Tere wade par jiye hum to yeh jaan jhoot jana Ki khushi se mar na jaate agar aitbaar hota Teri nazuki se jana ki bandha tha ahd-e-buda Kabhi tu na tod sakta agar ustawar hota Koi mere dil se pooche tere teer-e-neem-kash ko Yeh khalish kahan se hoti jo jigar ke paar hota Yeh kahan ki dosti hai ki bane hain dost nasih Koi chara-saz hota koi ghamgusar hota Rag-e-sang se tapakta woh lahu ki phir na thamta Jise gham samajh rahe ho yeh agar sharar hota Gham agarche jaan-gusal hai pe kahan bachein ki dil hai Gham-e-ishq gar na hota gham-e-rozgar hota Kahoon kis se main ki kya hai shab-e-gham buri bala hai Mujhe kya bura tha marna agar ek baar hota Hue mar ke hum jo ruswa hue kyon na gharq-e-dariya Na kabhi janaza uthta na kahin mazaar hota Use kaun dekh sakta ki yagana hai woh yakta Jo do'i ki boo bhi hoti to kahin do-char hota Yeh masa'il-e-tasawwuf yeh tera bayan Ghalib Tujhe hum wali samajhte jo na baada-khwar hota