اب کے تجدید وفا کا نہیں امکاں جاناں
اب کے تجدید وفا کا نہیں امکاں جاناں یاد کیا تجھ کو دلائیں ترا پیماں جاناں یوں ہی موسم کی ادا دیکھ کے یاد آیا ہے کس قدر جلد بدل جاتے ہیں انساں جاناں زندگی تیری عطا تھی سو ترے نام کی ہے ہم نے جیسے بھی بسر کی ترا احساں جاناں دل یہ کہتا ہے کہ شاید ہے فسردہ تو بھی دل کی کیا بات کریں دل تو ہے ناداں جاناں اول اول کی محبت کے نشے یاد تو کر بے پیے بھی ترا چہرہ تھا گلستاں جاناں آخر آخر تو یہ عالم ہے کہ اب ہوش نہیں رگ مینا سلگ اٹھی کہ رگ جاں جاناں مدتوں سے یہی عالم نہ توقع نہ امید دل پکارے ہی چلا جاتا ہے جاناں جاناں ہم بھی کیا سادہ تھے ہم نے بھی سمجھ رکھا تھا غم دوراں سے جدا ہے غم جاناں جاناں اب کے کچھ ایسی سجی محفل یاراں جاناں سر بہ زانو ہے کوئی سر بہ گریباں جاناں ہر کوئی اپنی ہی آواز سے کانپ اٹھتا ہے ہر کوئی اپنے ہی سائے سے ہراساں جاناں جس کو دیکھو وہی زنجیر بہ پا لگتا ہے شہر کا شہر ہوا داخل زنداں جاناں اب ترا ذکر بھی شاید ہی غزل میں آئے اور سے اور ہوئے درد کے عنواں جاناں ہم کہ روٹھی ہوئی رت کو بھی منا لیتے تھے ہم نے دیکھا ہی نہ تھا موسم ہجراں جاناں ہوش آیا تو سبھی خواب تھے ریزہ ریزہ جیسے اڑتے ہوئے اوراق پریشاں جاناں
English rendering
Ab ke tajdeed-e-wafa ka nahin imkaan jaanan Yaad kya tujh ko dilayein tera paimaan jaanan Yun hi mausam ki ada dekh ke yaad aaya hai Kis qadar jald badal jaate hain insaan jaanan Zindagi teri ata thi so tere naam ki hai Humne jaise bhi basar ki tera ehsaan jaanan Dil yeh kehta hai ke shayad hai fasurda tu bhi Dil ki kya baat karein dil to hai nadaan jaanan Awwal awwal ki mohabbat ke nashe yaad to kar Be piye bhi tera chehra tha gulistaan jaanan Aakhir aakhir to yeh aalam hai ke ab hosh nahin Rag-e-meena sulag uthi ke rag-e-jaan jaanan Muddaton se yehi aalam na tawaqqo na umeed Dil pukaare hi chala jaata hai jaanan jaanan Hum bhi kya saada the humne bhi samajh rakha tha Gham-e-dauraan se juda hai gham-e-jaanan jaanan Ab ke kuch aisi saji mehfil-e-yaaraan jaanan Sar ba zaanu hai koi sar ba garebaan jaanan Har koi apni hi aawaz se kaanp uthta hai Har koi apne hi saaye se haraasaan jaanan Jis ko dekho wohi zanjeer ba paa lagta hai Shehr ka shehr hua daakhil-e-zindaan jaanan Ab tera zikr bhi shayad hi ghazal mein aaye Aur se aur hue dard ke unwaan jaanan Hum ke roothi hui rut ko bhi mana lete the Humne dekha hi na tha mausam-e-hijraan jaanan Hosh aaya to sabhi khwab the reza reza Jaise udte hue auraaq-e-pareshaan jaanan