اک رنج بہ پیرایۂ زر کیوں نہیں جاتا — اختر عثمان
شاعر
اک رنج بہ پیرایۂ زر کیوں نہیں جاتا
اک رنج بہ پیرایۂ زر کیوں نہیں جاتا
کشکول ہوس ہے تو یہ بھر کیوں نہیں جاتا
وہ آئنہ رو ہے تو مرا روپ دکھائے
میں اس کے مقابل ہوں سنور کیوں نہیں جاتا
دریا کا تلاطم تو بہت دن کی کتھا ہے
لیکن مرے اندر کا بھنور کیوں نہیں جاتا
کہتے ہو کہ ہو اسوۂ شبیر پہ قائم
دربار میں کیوں جاتے ہو سر کیوں نہیں جاتا
جب روح سے کہتے ہو کہ لبیک حسینا
پھر جی سے یزیدوں کا یہ ڈر کیوں نہیں جاتا
تم صاحب معنیٰ ہو تو تمثال پہ مت جاؤ
الزام کبھی آئنے پر کیوں نہیں جاتا
لو شام گئی رات ہے کابوس ہے میں ہوں
میں صبح کا بھولا ہوں تو گھر کیوں نہیں جاتا
ہر سنگ دعا مجھ کو لگا پھول سے بڑھ کر
جب اتنی دعائیں ہیں تو مر کیوں نہیں جاتا
اخترؔ تری گفتار فسوں کار میں کیا ہے
جو بھی ادھر آتا ہے ادھر کیوں نہیں جاتا
اختر عثمان
Ek ranj ba-paira ye zar kyuun nahin jaata
Ek ranj ba-paira ye zar kyuun nahin jaata
Kashkol-e-hawas hai to ye bhar kyuun nahin jaata
Woh aaina-ruu hai to mira roop dikhae
Main us ke muqabil hoon sanwar kyuun nahin jaata
Darya ka talatum to bahut din ki katha hai
Lekin mire andar ka bhanwar kyuun nahin jaata
Kehte ho ke ho uswa-e-Shabbir pe qaim
Darbar mein kyuun jaate ho sar kyuun nahin jaata
Jab rooh se kehte ho ke Labbaik Husaina
Phir jee se Yazidon ka ye dar kyuun nahin jaata
Tum sahib-e-ma'ani ho to timsaal pe mat jaao
Ilzam kabhi aaine par kyuun nahin jaata
Lo shaam gai raat hai kaboos hai main hoon
Main subh ka bhula hoon to ghar kyuun nahin jaata
Har sang-e-dua mujh ko laga phool se badh kar
Jab itni duaen hain to mar kyuun nahin jaata
Akhtar! Teri guftar fasoon-kar mein kya hai
Jo bhi idhar aata hai udhar kyuun nahin jaata
شاعر کے بارے میں
اختر عثمان عہدِ حاضر کے اُن اہم اردو شعرا میں شمار ہوتے ہیں جنہوں نے جدید اردو شاعری کو سماجی شعور، فکری گہرائی اور داخلی کرب کے نئے زاویے عطا کیے۔ ان کا اصل نام اختر محمود ہے اور وہ 4 اپریل 1969ء کو اسلام آباد میں پیدا ہوئے، جبکہ ان کا آبائی تعلق ڈیرہ غازی خان سے ہے۔ ان کی ابتدائی زندگی راولپنڈی میں گزری جہاں انہوں نے سینٹ پالز کیمبرج اسکول سے ...
مکمل تعارف پڑھیں