جب دور ہیں تجھ سے تو یہ افتاد بھی آئے — اختر عثمان
شاعر
جب دور ہیں تجھ سے تو یہ افتاد بھی آئے
جب دور ہیں تجھ سے تو یہ افتاد بھی آئے
طوفان شب دشت میں تو یاد بھی آئے
حیران ہے اس بات پہ انبوہ اسیراں
پر کھلنے کی تقریب میں صیاد بھی آئے
ہارے ہوئے لشکر کا علم گر بھی چکا ہے
اب کیا جو کسی سمت سے امداد بھی آئے
اک عمر ہوئی نذر خرابات ہماری
صد شکر سر قریۂ آباد بھی آئے
اک بو کہ بغل گیر ہوئی دشت میں ہم سے
جیسے یہاں پہلے کبھی اجداد بھی آئے
اختر عثمان
Jab door hain tujh se to ye iftad bhi aaye
Jab door hain tujh se to ye iftad bhi aaye
Toofan-e-shab-e-dasht mein to yaad bhi aaye
Hairan hai is baat pe anboh-e-aseeran
Par khulne ki taqreeb mein sayyad bhi aaye
Haare hue lashkar ka alam gir bhi chuka hai
Ab kya jo kisi simt se imdad bhi aaye
Ek umr hui nazr-e-kharabaat hamari
Sad shukr sar-e-qarya-e-aabaad bhi aaye
Ek boo ke baghal-geer hui dasht mein hum se
Jaise yahan pehle kabhi ajdad bhi aaye
شاعر کے بارے میں
اختر عثمان عہدِ حاضر کے اُن اہم اردو شعرا میں شمار ہوتے ہیں جنہوں نے جدید اردو شاعری کو سماجی شعور، فکری گہرائی اور داخلی کرب کے نئے زاویے عطا کیے۔ ان کا اصل نام اختر محمود ہے اور وہ 4 اپریل 1969ء کو اسلام آباد میں پیدا ہوئے، جبکہ ان کا آبائی تعلق ڈیرہ غازی خان سے ہے۔ ان کی ابتدائی زندگی راولپنڈی میں گزری جہاں انہوں نے سینٹ پالز کیمبرج اسکول سے ...
مکمل تعارف پڑھیں