ابھی حویلی بٹی نہیں تھی
ابھی حویلی بٹی نہیں تھی مکین خوش تھے بساطِ دل کے کسی بھی مہرے پہ عقل غالب نہیں ہوئی تھی رسوئی خانے میں بہن بھائیوں کی سانجھ ہنڈیا میں پک رہی تھی یہیں کہیں پر صحن میں رکھے پلنگ پہ لیٹا نحیف بوڑھا ادھورے سپنوں کو پھر سے تجسیم کر رہا تھا کہ بجھتی آنکھوں میں ماند پڑتی کرن کرن سے اک ایک ذرّا ادھار لیکر جوان پیڑھی میں خواب تقسیم کر رہا تھا حسد ، اندیشے ، طمع و لالچ صحن کی چوکھٹ سے دور رستے کی دُھول بن کر پڑے ہوئے تھے کہ خاک اب تک اُڑی نہیں تھی فشارِ خوں کی دوائیں ، سگرٹ ، نظر کا چشمہ ابھی کسی پر گِراں نہیں تھا ابھی یہ گھر تھا مکاں نہیں تھا ابھی وراثت میں قہقہے ، درد ، خواب ، ہاتھوں کے لمس آپس میں بٹ رہے تھے کہ زندگانی کے دن کٹھن تھے مگر سہولت سے کٹ رہے تھے محبتوں کا چراغ جلتا تھا طاقچے میں مگر یہ سب ٹھیک تب تلک تھا نحیف سانسوں کی ڈور جب تک کٹی نہیں تھی ابھی حویلی بٹی نہیں تھی !
English rendering
Abhi haveli bati nahin thi Makeen khush the Bisaat-e-dil ke kisi bhi mohre pe Aql ghalib nahin hui thi Rasoi khane mein behen bhaiyon ki saanjh handiya mein pak rahi thi Yahin kahin par Sehan mein rakhe palang pe leta Naheef boodha Adhoore sapnon ko phir se tajseem kar raha tha Ke bujhti aankhon mein maand padti kiran kiran se Ik ik zarra udhaar le kar Jawaan peedhi mein khwab taqseem kar raha tha Hasad, andeshe, tama'a o laalach Sehan ki chaukhat se door Raste ki dhool ban kar pade hue the Ke khaak ab tak udi nahin thi Fishaar-e-khoon ki dawaiyan, cigarette, nazar ka chashma Abhi kisi par giraan nahin tha Abhi yeh ghar tha makaan nahin tha Abhi wirasat mein qahqahe, dard, khwab, haathon ke lams Aapas mein bat rahe the Ke zindagani ke din kathin the Magar sahoolat se kat rahe the Muhabbaton ka Chiragh jalta tha taaqche mein Magar yeh sab theek Tab talak tha Naheef saanson ki dor jab tak Kati nahin thi Abhi haveli bati nahin thi !