گوڈو — باقر مہدی
شاعر
گوڈو
ہوائیں چلتی ہیں تھمتی ہیں بہنے لگتی ہیں
نئے لباس نئے رنگ روپ سج دھج سے
پرانے زخم نئے دن کو یاد کرتے ہیں
وہ دن جو آ کے نقابیں اتار ڈالے گا
نظر کو دل سے ملائے گا دل کو باتوں سے
ہر ایک لفظ میں معنی کی روشنی ہوگی
مگر یہ خواب کی باتیں سراب کی یادیں
ہر ایک بار پشیمان دل گرفتہ ہیں
صبح کے سارے ہی اخبار وحشت افزا ہیں
ہر ایک رہزن و رہبر کی آج بن آئی
کہ اب ہر ایک جیالا ہے سورما سب ہیں
بتاؤں کس سے کہ میں منتظر ہوں جس دن کا
وہ شاید اب نہ کبھی آئے گا زمانے میں
کہاں پہ ہے مرا گوڈو مجھے خبر ہی نہیں
اسے میں ڈھونڈ چکا روم اور لندن میں
نہ ماسکو میں ملا اور نہ چین و پیرس میں
بھلا ملے گا کہاں بمبئی کی گلیوں میں
یہ انتظار مسلسل یہ جاں کنی یہ عذاب
ہر ایک لمحہ جہنم ہر ایک خواب سراب
باقر مہدی
Goodu
Hawayein chalti hain, thamti hain, behne lagti hain
Naye libaas, naye rang roop, saj dhaj se
Purane zakhm naye din ko yaad karte hain
Woh din jo aa ke naqabein utaar daale ga
Nazar ko dil se milaaye ga, dil ko baaton se
Har ek lafz mein maani ki roshni hogi
Magar yeh khwab ki baatein, saraab ki yaadein
Har ek baar pashemaan dil-girifta hain
Subh ke saare hi akhbaar wahshat-afza hain
Har ek rahzan-o-rahbar ki aaj ban aayi
Ke ab har ek jiyaala hai, soorma sab hi hain
Bataa'un kis se ke main muntazir hoon jis din ka
Woh shayad ab na kabhi aaye ga zamaane mein
Kahaan pe hai mera Goodu, mujhe khabar hi nahin
Usey main dhoond chuka Rome aur London mein
Na Moscow mein mila aur na Cheen o Paris mein
Bhala mile ga kahaan Bombay ki galiyon mein
Yeh intezaar musalsal, yeh jaan-kani, yeh azaab
Har ek lamha jahannum, har ek khwab saraab
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں