نئی جستجو کا المیہ — باقر مہدی
شاعر
نئی جستجو کا المیہ
تخیل کی اونچی اڑانوں سے آگے
جہاں خواب ٹوٹے پڑے ہیں
مری آرزو تھی وہاں جا کے دیکھوں
رفیقوں رقیبوں کے چہرے
مری ہر بغاوت پہ ہنستے رہے ہیں
میں رفتار کے دائرے توڑ کر
خدا سے پرے جا چکا ہوں
فرشتوں کی پہلی بغاوت کا منظر مجھے یاد آیا
کچھ ایسا لگا جیسے آدم کا سارا المیہ
نئی جستجو کے سہارے ہمیشہ رہے گا
ہر اک بار باغی نئے بن کے
وہ داستاں پھر سے دہرا رہے ہیں
خود ابلیس حیران ہے
خیر و شر کی نئی کش مکش میں الجھ کر ہر اک بار یہ سوچتا ہے
''خدایا! میں مظلوم ہوں
میری فطرت میں جو سرکشی تھی وہ آدم سے تھی
تیرا بندہ ہوں عاجز ہوں تو رحم کر
دیکھ ایک مدت سے آدم کے بیٹے
تجھے اور مجھے بھول کر
صرف بے نام بے سود سے جستجو کے سہارے بڑھے جا رہے ہیں
انہیں تیری رحمت تیرا قہر کچھ بھی ڈراتا نہیں
مجھے آج پہلی دفعہ ڈر لگا ہے
کہیں یہ مجھے اور تجھے قید کر کے
صرف تخلیق کے جرم میں وہ سزا دیں
جس کو لاکھوں برس سے یہ سہتے چلے آ رہے ہیں!''
باقر مہدی
Nayi Justuju Ka Almiya
Takhayyal ki oonchi udaanon se aage
Jahaan khwab toote pade hain
Meri aarzoo thi wahaan ja ke dekhun
Rafeeqon raqeebon ke chehre
Meri har baghawat pe hanste rahe hain
Main raftaar ke daayre tod kar
Khuda se pare ja chuka hoon
Farishton ki pehli baghawat ka manzar mujhe yaad aaya
Kuch aisa laga jaise Adam ka saara almiya
Nayi justuju ke sahaare hamesha rahega
Har ek baar baghi naye ban ke
Woh daastaan phir se dohra rahe hain
Khud Iblees hairan hai
Khair-o-shar ki nayi kashmakash mein ulajh kar har ek baar yeh sochta hai
''Khudaya! Main mazloom hoon
Meri fitrat mein jo sarkashi thi woh Adam se thi
Tera banda hoon, aajiz hoon, tu rehm kar
Dekh, ek muddat se Adam ke bete
Tujhe aur mujhe bhool kar
Sirf be-naam be-sood se justuju ke sahaare badhe ja rahe hain
Inhein teri rehmat, tera qahar kuch bhi darata nahin
Mujhe aaj pehli dafaa dar laga hai
Kahin yeh mujhe aur tujhe qaid kar ke
Sirf takhleeq ke jurm mein woh saza dein
Jisko laakhon baras se yeh sehte chale aa rahe hain!''
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں