یہ رات — باقر مہدی
شاعر
یہ رات
ستارے چپ ہیں کہ چلتی ہے تیز تیز ہوا
یہ رات اپنی محبت کی رات بھی تو نہیں
فضا میں یادوں کے جگنو چمک رہے ہیں ابھی
حسین یادوں کو لیکن ثبات بھی تو نہیں
غم حیات سے مانوس ہو چلا ہے دل
نئے نئے ہی سہی سانحات بھی تو نہیں
بدل کے رکھ دیں جو لیل و نہار دنیا کے
ابھی حیات کے وہ حادثات بھی تو نہیں
وہی ہے خون تمنا وہی ہے حسرت غم
یہ موت بھی تو نہیں ہے حیات بھی تو نہیں
یہ رات جہد مسلسل کی ایک رات سہی
تباہیوں کو لیے بار بار گزرے گی
کوئی بتائے کہاں تک کہ زندگی کی یہ رات
فسردہ گزری ہے اور سوگوار گزرے گی
ابھی تو روز یہی فکر ہے جئیں کیسے
ابھی تو رات یونہی بے قرار گزرے گی
سکون دل کے لیے آج بھی یقیں سا ہے
یہی چمن سے خزاں شرمسار گزرے گی
نئے چراغ جلائیں امید فردا سے
کبھی تو وادئ غم سے بہار گزرے گی
یہ رات ایک نئی یادگار لائی ہے
سجا کے زخموں کے پھولوں کا ہار لائی ہے
باقر مہدی
Yeh raat
Sitaare chup hain ke chalti hai tez tez hawa
Yeh raat apni mohabbat ki raat bhi to nahin
Fiza mein yaadon ke jugnu chamak rahe hain abhi
Haseen yaadon ko lekin sabaat bhi to nahin
Gham-e-hayaat se maanoos ho chala hai dil
Naye naye hi sahi saanehat bhi to nahin
Badal ke rakh dein jo lail-o-nahaar duniya ke
Abhi hayaat ke woh hadisaat bhi to nahin
Wahi hai khoon-e-tamanna wahi hai hasrat-e-gham
Yeh maut bhi to nahin hai hayaat bhi to nahin
Yeh raat jahd-e-musalsal ki ek raat sahi
Tabahiyon ko liye baar baar guzregi
Koi bataye kahaan tak ke zindagi ki yeh raat
Fasurda guzri hai aur sogwaar guzregi
Abhi to roz yehi fikr hai jiyein kaise
Abhi to raat yunhi be-qarar guzregi
Sukoon-e-dil ke liye aaj bhi yaqeen sa hai
Yehi chaman se khizaan sharmsaar guzregi
Naye charaagh jalayein umeed-e-farda se
Kabhi to wadi-e-gham se bahaar guzregi
Yeh raat ek nayi yaadgaar laayi hai
Saja ke zakhmon ke phoolon ka haar laayi hai
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں