چاند نکلے کسی جانب تری زیبائی کا — فیض احمد فیض
شاعر
چاند نکلے کسی جانب تری زیبائی کا
چاند نکلے کسی جانب تری زیبائی کا
رنگ بدلے کسی صورت شب تنہائی کا
دولت لب سے پھر اے خسرو شیریں دہناں
آج ارزاں ہو کوئی حرف شناسائی کا
گرمئی رشک سے ہر انجمن گل بدناں
تذکرہ چھیڑے تری پیرہن آرائی کا
صحن گلشن میں کبھی اے شہ شمشاد قداں
پھر نظر آئے سلیقہ تری رعنائی کا
ایک بار اور مسیحائے دل دل زدگاں
کوئی وعدہ کوئی اقرار مسیحائی کا
دیدہ و دل کو سنبھالو کہ سر شام فراق
ساز و سامان بہم پہنچا ہے رسوائی کا
Chaand nikle kisi jaanib teri zebai ka
Chaand nikle kisi jaanib teri zebai ka
Rang badle kisi surat shab-e-tanhai ka
Daulat-e-lab se phir aye Khusrau-e-shireen-dahanan
Aaj arzaan ho koi harf-e-shanasai ka
Garmi-e-rashk se har anjuman-e-gul-badan'an
Tazkira chheRe teri pairahan-aarai ka
Sehan-e-gulshan mein kabhi aye shah-e-shamshad-qadaan
Phir nazar aaye saleeqa teri ra'anai ka
Ek baar aur Maseeha-e-dil dil-zadgaan
Koi va'ada koi iqrar-e-maseehai ka
Deeda-o-dil ko sambhalo ke sar-e-sham-e-firaq
Saaz-o-samaan baham pohncha hai ruswai ka