آخر کار چلے تیر کی رفتار قدم — حیدر علی آتش
شاعر
آخر کار چلے تیر کی رفتار قدم
آخر کار چلے تیر کی رفتار قدم
غیر منزل نہ پڑے راہ میں زنہار قدم
اٹھ گئے وصل کی شب پیشتر از یار قدم
آگے ہم عمر رواں سے بھی چلے چار قدم
کوئے مقصود سے یوں رکھتی ہے غفلت مجھے دور
جیسے سو جانے سے ہو جاتے ہیں بیکار قدم
اہل عالم میں ہوں میں زندوں میں مردوں کی طرح
بڑھ چلیں لاکھ مگر ساتھ ہیں دو چار قدم
ایک مدت سے رہ کعبہ میں آوارہ ہیں
کیا خدا کا مجھے دکھلائیں گے دیدار قدم
جوش وحشت میں بھی میں چڑھ کے نہ اس پر دوڑا
لے گئے حسرت خار سر دیوار قدم
صورت برگ خزاں جھڑتے ہیں ہر گام گناہ
جب اٹھاتے ہیں تری راہ میں زوار قدم
اے جنوں کوہ و بیابان بھی دکھلا مجھ کو
رہیں پستی و بلندی سے خبردار قدم
کوچہ گردی یہ شب و روز کی بے وجہ نہیں
ایڑیاں رگڑیں گے کس کے پس دیوار قدم
جادۂ راہ محبت کو خط مسطر جان
سر کے بل مثل قدم چل جو ہوں بیکار قدم
خاک بھی ہوں تو ہوں خاک در اس کا آتشؔ
جس کے تھے دوش پیمبر کے سزا وار قدم
Aakhir-kaar chale teer ki raftaar qadam
Aakhir-kaar chale teer ki raftaar qadam
Ghair manzil na pade raah mein zanhaar qadam
Uth gaye vasl ki shab peshtar az yaar qadam
Aage hum umr-e-ravaan se bhi chale chaar qadam
Koo-e-maqsood se yoon rakhti hai ghaflat mujhe door
Jaise so jaane se ho jaate hain bekaar qadam
Ahl-e-aalam mein houn main zindon mein murdon ki tarah
Badh chalen laakh magar saath hain do chaar qadam
Ek muddat se rah-e-Ka'be mein aawara hain
Kya Khuda ka mujhe dikhlaayenge deedaar qadam
Josh-e-wehshat mein bhi main chadh ke na us par dauda
Le gaye hasrat-e-khar sar-e-deewar qadam
Soorat-e-barg-e-khizaan jhadte hain har gaam gunaah
Jab uthaate hain teri raah mein zawwar qadam
Aye junoon koh o biyabaan bhi dikhla mujh ko
Rahein pasti o bulandi se khabardaar qadam
Koocha-gardi yeh shab o roz ki be wajah nahin
Aidiyan ragdenge kis ke pas-e-deewar qadam
Jaada-e-raah-e-mohabbat ko khat-e-mistar jaan
Sar ke bal misl-e-qadam chal jo houn bekaar qadam
Khaak bhi houn to houn khaak-e-dar uska Atish
Jis ke the dosh-e-payambar ke saza-waar qadam
شاعر کے بارے میں
خواجہ حیدر علی آتش اردو کے کلاسیکی دور کے نامور شاعر اور دبستانِ لکھنؤ کے اہم نمائندہ تھے۔ ان کی پیدائش 1778ء (بعض تذکروں کے مطابق 1764ء یا 1767ء) ...
مکمل تعارف پڑھیں