نا فہمی اپنی پردہ ہے دیدار کے لیے — حیدر علی آتش

Na fehmi apni parda hai deedar ke liye

Na fehmi apni parda hai deedar ke liye
Warna koi naqab nahin yaar ke liye
Noor-e-tajalli hai tere rukhsar ke liye
Aankhen meri Kaleem hain deedar ke liye
Fidwi bahut us abroo-e-kham-dar ke liye
Cho rang ki kami nahin talwar ke liye
Qaul apna hai yeh sabha o zunnar ke liye
Do phande hain yeh kafir o deen-dar ke liye
Lutf-e-chaman hai bulbul gulzar ke liye
Kaifiyat-e-sharab hai mai khwar ke liye
Seeri na hogi tishna deedar ke liye
Pani nahin chah-e-zaqan-e-yaar ke liye
Itni hi hai namood meri yaar ke liye
Shuhra hai jis qadar mere ash'ar ke liye
Dasht-e-adam se aate hain bagh-e-jahan mein hum
Be daagh lala o gul-e-be-khar ke liye
Shamshad apne tare ko beche to leejiye
Us lala ru ki lipatti dastar ke liye
Do aankhen chehre par nahin tere faqeer ke
Do theekre hain bheek ke deedar ke liye
Surma lagaya keejiye aankhon mein mehrban
Iksir yeh safuf hai beemar ke liye
Halqe mein zulf-e-yaar ki moti proiye
Dandaan zaroor hain dahan-e-maar ke liye
Guft-o-shuneed mein hon basar din bahar ke
Gul ke liye hai gosh zaban khar ke liye
Be yaar sar patakne se hilta hai ghar mera
Rehta hai zalzala dar o deewar ke liye
Baitha jo us ke saaye mein deewanah ho gaya
Saya pari ka hai teri deewar ke liye
Bulbul hi ko bahar ke jaane ka gham nahin
Har barg haath milta hai gulzar ke liye
Ae Shah-e-husn zulf o rukh o gosh chashm o lab
Kya kya ilaqe hain teri Sarkar ke liye
Chaal abr ki chala jo gulistaan mein jhoom kar
Taus ne qadam tere rahwar ke liye
Aya jo dekhne tere husn o jamal ko
Pakda gaya woh ishq ki begaar ke liye
Hajat nahin banao ki ae nazneen tujhe
Zewar hai saadgi tere rukhsar ke liye
Beemar tandurust ho dekhe jo ruy-e-yaar
Kya chashni hai sharbat-e-deedar ke liye
Us badshah-e-husn ki manzil mein chahiye
Baal huma ki par chhat-ti deewar ke liye
Sauda-e-zulf-e-yaar mein kafir hua hon main
Sunbal ke taar chahiye zunnar ke liye
Zanjeer o tauq jo keh hai bazaar-e-dahar mein
Sauda hai us pari ke kharidar ke liye
Choona banenge baad-e-fana apne astukhwan
Daulat sarai-e-yaar ki deewar ke liye
Maashooq ki zaban se hai dushnaam dil pazeer
Shireeni zehar hai teri guftar ke liye
Jaan se aziz-tar hai mere dil ko daagh-e-ishq
Mehtab lahad ki shab-e-tar ke liye
Woh mast-e-khwab chashm hai koi balay-e-bad
Kya martaba hai fitna-e-bedar ke liye
Khalwat se anjuman ka kahan yaar ko dimagh
Woh jins-e-be-baha nahin bazaar ke liye
Pahna hai jab se tu ne shab-e-mah mein use
Kya kya shagoofe phoolte hain haar ke liye
Chhukde hue hain soch ke rah-e-wafa mein paon
Pahiye lagaiye inhen raftaar ke liye
Jo mushtari hai banda hai us khush jamal ka
Yusuf bane ghulam kharidar ke liye
Sone ke patte hoven har ek gul ke kaan mein
Maqdoor ho jo bulbul-e-gulzar ke liye
Gulhai-e-zakhm se hon shahadat talab nehaal
Taufeeq-e-khair ho teri talwar ke liye
Andher hai jo dam ki na us ke ho roshni
Yusuf mera chiragh hai bazaar ke liye
Ehsaan jo ibtida se hai Atash wohi hai aaj
Kuchh intiha nahin karam-e-yaar ke liye