وہی چتون کی خوں خواری جو آگے تھی سو اب بھی ہے — حیدر علی آتش
شاعر
وہی چتون کی خوں خواری جو آگے تھی سو اب بھی ہے
وہی چتون کی خوں خواری جو آگے تھی سو اب بھی ہے
تری آنکھوں کی بیماری جو آگے تھی سو اب بھی ہے
وہی نشو نمائے سبزہ ہے گور غریباں پر
ہوائے چرخ زنگاری جو آگے تھی سو اب بھی ہے
تعلق ہے وہی تا حال ان زلفوں کے سودے سے
سلاسل کی گرفتاری جو آگے تھی سو اب بھی ہے
وہی سر کا پٹکنا ہے وہی رونا ہے دن بھر کا
وہی راتوں کی بیداری جو آگے تھی سو اب بھی ہے
رواج عشق کے آئیں وہی ہیں کشور دل میں
رہ و رسم وفا جاری جو آگے تھی سو اب بھی ہے
وہی جی کا جلانا ہے پکانا ہے وہی دل کا
وہ اس کی گرم بازاری جو آگے تھی سو اب بھی ہے
نیاز خادمانہ ہے وہی فضل الٰہی سے
بتوں کی ناز برداری جو آگے تھی سو اب بھی ہے
فراق یار میں جس طرح سے مرتا تھا مرتا ہوں
وہ روح و تن کی بے زاری جو آگے تھی سو اب بھی ہے
وہی سودائے کاکل کا ہے عالم جو کہ سابق تھا
یہ شب بیمار پر بھاری جو آگے تھی سو اب بھی ہے
جنوں کی گرم جوشی ہے وہی دیوانوں سے اپنی
وہی داغوں کی گلکاری جو آگے تھی سو اب بھی ہے
وہی بازار گرمی ہے محبت کی ہنوز آتشؔ
وہ یوسف کی خریداری جو آگے تھی سو اب بھی ہے
Wohi chittoñ ki khooñ-khwāri jo aage thi so ab bhi hai
Wohi chittoñ ki khooñ-khwāri jo aage thi so ab bhi hai
Teri ānkhoñ ki bīmāri jo aage thi so ab bhi hai
Wohi nashv-o-numā-e-sabza hai gor-e-gharībāñ par
Hawā-e-charkh-e-zangāri jo aage thi so ab bhi hai
Ta'alluq hai wohi tā-haal un zulfoñ ke saude se
Salāsil ki giraftāri jo aage thi so ab bhi hai
Wohi sar ka paTkana hai wohi rona hai din bhar ka
Wohi rātoñ ki bedāri jo aage thi so ab bhi hai
Rawāj-e-ishq ke aa'iñ wohi hain kishwar-e-dil mein
Rah-o-rasm-e-wafā jāri jo aage thi so ab bhi hai
Wohi jee ka jalāna hai pakāna hai wohi dil ka
Wo us ki garm-bāzāri jo aage thi so ab bhi hai
Niyāz-e-khādimāna hai wohi fazl-e-ilāhi se
Butoñ ki nāz-bardāri jo aage thi so ab bhi hai
Firāq-e-yār mein jis tarah se martā tha martā huñ
Wo rooh-o-tan ki be-zāri jo aage thi so ab bhi hai
Wohi sauda-e-kākul ka hai alam jo keh sābiq tha
Ye shab bīmār par bhāri jo aage thi so ab bhi hai
Junūñ ki garm-joshī hai wohi deewanoñ se apni
Wohi dāghoñ ki gul-kāri jo aage thi so ab bhi hai
Wohi bāzār-e-garmī hai mohabbat ki hunooz Atish!
Wo Yusuf ki kharīdāri jo aage thi so ab bhi hai
شاعر کے بارے میں
خواجہ حیدر علی آتش اردو کے کلاسیکی دور کے نامور شاعر اور دبستانِ لکھنؤ کے اہم نمائندہ تھے۔ ان کی پیدائش 1778ء (بعض تذکروں کے مطابق 1764ء یا 1767ء) ...
مکمل تعارف پڑھیں