کون اس تیغ ستم گر سے بچا
کون اس تیغ ستم گر سے بچا جو بچا اپنے مقدر سے بچا صاف انکار ہی بہتر ہے کہ میں زحمت عرض مکرر سے بچا لے نہ ڈوبیں مری موجیں مجھ کو آ مجھے میرے سمندر سے بچا جس کو آئینہ بنانا ہو تجھے ایسے پتھر کو مرے سر سے بچا راستے میں مجھے منزل نہ ملی یہ بھی اچھا ہوا ٹھوکر سے بچا آشیاں شاخ ہوا پر اس کا میرے ٹوٹے ہوئے شہ پر سے بچا محبس ذات سے باہر لے چل مجھ کو اس گنبد بے در سے بچا میں جو محسنؔ ہوا مجروح تو کیا وہ بھی کب وقت کے خنجر سے بچا
English rendering
Kaun is tegh e sitamgar se bacha Jo bacha apne muqaddar se bacha Saaf inkaar hi behtar hai ke main Zehmat e arz e mukarrar se bacha Le na doobein meri maujein mujh ko Aa mujhe mere samundar se bacha Jis ko aaina banaana ho tujhe Aise patthar ko mere sar se bacha Raste mein mujhe manzil na mili Yeh bhi achha hua thokar se bacha Aashiyaan shaakh e hawa par us ka Mere tootay hue shah par se bacha Mahbas e zaat se baahar le chal Mujh ko is gumbad e be dar se bacha Main jo Mohsinؔ hua majrooh to kya Woh bhi kab waqt ke khanjar se bacha