فلسفی کو بحث کے اندر خدا ملتا نہیں
فلسفی کو بحث کے اندر خدا ملتا نہیں ڈور کو سلجھا رہا ہے اور سرا ملتا نہیں معرفت خالق کی عالم میں بہت دشوار ہے شہر تن میں جب کہ خود اپنا پتا ملتا نہیں غافلوں کے لطف کو کافی ہے دنیاوی خوشی عاقلوں کو بے غم عقبیٰ مزا ملتا نہیں کشتئ دل کی الٰہی بحر ہستی میں ہو خیر ناخدا ملتے ہیں لیکن با خدا ملتا نہیں غافلوں کو کیا سناؤں داستان عشق یار سننے والے ملتے ہیں درد آشنا ملتا نہیں زندگانی کا مزا ملتا تھا جن کی بزم میں ان کی قبروں کا بھی اب مجھ کو پتا ملتا نہیں صرف ظاہر ہو گیا سرمایۂ زیب و صفا کیا تعجب ہے جو باطن با صفا ملتا نہیں پختہ طبعوں پر حوادث کا نہیں ہوتا اثر کوہساروں میں نشان نقش پا ملتا نہیں شیخ صاحب برہمن سے لاکھ برتیں دوستی بے بھجن گائے تو مندر سے ٹکا ملتا نہیں جس پہ دل آیا ہے وہ شیریں ادا ملتا نہیں زندگی ہے تلخ جینے کا مزا ملتا نہیں لوگ کہتے ہیں کہ بد نامی سے بچنا چاہئے کہہ دو بے اس کے جوانی کا مزا ملتا نہیں اہل ظاہر جس قدر چاہیں کریں بحث و جدال میں یہ سمجھا ہوں خودی میں تو خدا ملتا نہیں چل بسے وہ دن کہ یاروں سے بھری تھی انجمن ہائے افسوس آج صورت آشنا ملتا نہیں منزل عشق و توکل منزل اعزاز ہے شاہ سب بستے ہیں یاں کوئی گدا ملتا نہیں بار تکلیفوں کا مجھ پر بار احساں سے ہے سہل شکر کی جا ہے اگر حاجت روا ملتا نہیں چاندنی راتیں بہار اپنی دکھاتی ہیں تو کیا بے ترے مجھ کو تو لطف اے مہ لقا ملتا نہیں معنیٔ دل کا کرے اظہار اکبرؔ کس طرح لفظ موزوں بہر کشف مدعا ملتا نہیں
English rendering
Falsafi ko bahas ke andar Khuda milta nahin Dor ko suljha raha hai aur sira milta nahin Ma'rifat-e-Khaliq ki aalam mein bahut dushwar hai Shehr-e-tan mein jab ke khud apna pata milta nahin Ghafiloan ke lutf ko kaafi hai duniyawi khushi Aaqiloan ko be-gham uqba maza milta nahin Kashti-e-dil ki Ilahi bahr-e-hasti mein ho khair Nakhuda milte hain lekin ba Khuda milta nahin Ghafiloan ko kya sunaun daastan-e-ishq-e-yaar Sunne wale milte hain dard ashna milta nahin Zindagani ka maza milta tha jin ki bazm mein Un ki qabroan ka bhi ab mujh ko pata milta nahin Sirf zahir ho gaya sarmaya-e-zeb-o-safa Kya ta'ajjub hai jo baatin ba-safa milta nahin Pukhta tab'on par hawadis ka nahin hota asar Kohsaron mein nishan-e-naqsh-e-pa milta nahin Shaikh saahib Brahman se lakh bartein dosti Be bhajan gaaye to mandir se tika milta nahin Jis pe dil aaya hai woh shireen adaa milta nahin Zindagi hai talkh jeene ka maza milta nahin Log kehte hain ke badnaami se bachna chahiye Keh do be is ke jawani ka maza milta nahin Ahl-e-zahir jis qadar chahein karein bahas-o-jidaal Main yeh samjha hoon khudi mein to Khuda milta nahin Chal base woh din ke yaroan se bhari thi anjuman Haaye afsos aaj soorat ashna milta nahin Manzil-e-ishq-o-tawakkul manzil-e-e'zaaz hai Shah sab baste hain yaan koi gada milta nahin Baar takleefon ka mujh par baar-e-ehsan se hai sahl Shukr ki ja hai agar haajat rawa milta nahin Chandni raatein bahar apni dikhati hain to kya Be tere mujh ko to lutf aye mah-laqa milta nahin Ma'ni-e-dil ka kare izhaar Akbar kis tarah Lafz mauzoon ba-har kashf-e-muddaa milta nahin