نئی تہذیب
یہ موجودہ طریقے راہیٔ ملک عدم ہوں گے نئی تہذیب ہوگی اور نئے ساماں بہم ہوں گے نئے عنوان سے زینت دکھائیں گے حسیں اپنی نہ ایسا پیچ زلفوں میں نہ گیسو میں یہ خم ہوں گے نہ خاتونوں میں رہ جائے گی پردے کی یہ پابندی نہ گھونگھٹ اس طرح سے حاجب روئے صنم ہوں گے بدل جائے گا انداز طبائع دور گردوں سے نئی صورت کی خوشیاں اور نئے اسباب غم ہوں گے نہ پیدا ہوگی خط نسخ سے شان ادب آگیں نہ نستعلیق حرف اس طور سے زیب رقم ہوں گے خبر دیتی ہے تحریک ہوا تبدیل موسم کی کھلیں گے اور ہی گل زمزمے بلبل کے کم ہوں گے عقائد پر قیامت آئے گی ترمیم ملت سے نیا کعبہ بنے گا مغربی پتلے صنم ہوں گے بہت ہوں گے مغنی نغمۂ تقلید یورپ کے مگر بے جوڑ ہوں گے اس لیے بے تال و سم ہوں گے ہماری اصطلاحوں سے زباں نا آشنا ہوگی لغات مغربی بازار کی بھاشا سے ضم ہوں گے بدل جائے گا معیار شرافت چشم دنیا میں زیادہ تھے جو اپنے زعم میں وہ سب سے کم ہوں گے گزشتہ عظمتوں کے تذکرے بھی رہ نہ جائیں گے کتابوں ہی میں دفن افسانۂ جاہ و حشم ہوں گے کسی کو اس تغیر کا نہ حس ہوگا نہ غم ہوگا ہوئے جس ساز سے پیدا اسی کے زیر و بم ہوں گے تمہیں اس انقلاب دہر کا کیا غم ہے اے اکبرؔ بہت نزدیک ہیں وہ دن کہ تم ہوگے نہ ہم ہوں گے
English rendering
Yeh maujooda tareeqe raahi-e-mulk-e-adam honge Nayi tehzeeb hogi aur naye samaan baham honge Naye unwaan se zeenat dikhayenge haseen apni Na aisa pech zulfon mein na gesu mein yeh kham honge Na khaatoonon mein reh jaayegi parde ki yeh pabandi Na ghoonghat is tarah se hajib-e-roo-e-sanam honge Badal jaayega andaaz-e-tabaye daur-e-gardoon se Nayi soorat ki khushiyan aur naye asbab-e-gham honge Na paida hogi khat-e-naskh se shaan-e-adab aageen Na nasta'leeq harf is taur se zeb-e-raqam honge Khabar deti hai tehreek-e-hawa tabdeel-e-mausam ki Khulenge aur hi gul zamzame bulbul ke kam honge Aqaid par qayamat aayegi tarmeem-e-millat se Naya kaaba banega maghribi putle sanam honge Bahut honge mughanni naghma-e-taqleed-e-Europe ke Magar be-jod honge is liye be-taal o sam honge Hamari istilahaon se zubaan naa-aashna hogi Lughaat-e-maghribi bazaar ki bhasha se zam honge Badal jaayega mayar-e-sharafat chashm-e-duniya mein Ziyada the jo apne za'am mein woh sab se kam honge Guzishta azmaton ke tazkiray bhi reh na jaayenge Kitabon hi mein dafan afsana-e-jah o hasham honge Kisi ko is taghayyur ka na hiss hoga na gham hoga Hue jis saaz se paida isi ke zer o bam honge Tumhein is inqilaab-e-dehr ka kya gham hai aye Akbar! Bahut nazdeek hain woh din ke tum hoge na hum honge