کالے سفید پروں والا پرندہ اور میری ایک شام
جب دن ڈھل جاتا ہے، سورج دھرتی کی اوٹ میں ہو جاتا ہے اور بھڑوں کے چھتے جیسی بھن بھن بازاروں کی گرمی، افرا تفری موٹر، بس، برقی ریلوں کا ہنگامہ تھم جاتا ہے چائے خانوں ناچ گھروں سے کمسن لڑکے اپنے ہم سن معشوقوں کو جن کی جنسی خواہش وقت سے پہلے جاگ اٹھی ہے لے کر جا چکتے ہیں بڑھتی پھیلتی اونچی ہمالہ جیسی تعمیروں پر خاموشی چھا جاتی ہے تھیٹر تفریح گاہوں میں تالے پڑ جاتے ہیں اور بظاہر دنیا سو جاتی ہے میں اپنے کمرے میں بیٹھا سوچا کرتا ہوں کتوں کی دم ٹیڑھی کیوں ہوتی ہے یہ چتکبری دنیا جس کا کوئی بھی کردار نہیں ہے کوئی فلسفہ کوئی پائندہ اقدار نہیں، معیار نہیں ہے اس پر اہل دانش ودوان، فلسفی موٹی موٹی ادق کتابیں کیوں لکھا کرتے ہیں؟ فرقتؔ کی ماں نے شوہر کے مرنے پر کتنا کہرام مچایا تھا لیکن عدت کے دن پورے ہونے سے اک ہفتہ پہلے نیلمؔ کے ماموں کے ساتھ بدایوں جا پہنچی تھی بی بی کی صحنک، کونڈے، فاتحہ خوانی جنگ صفین، جمل اور بدر کے قصوں سیرت نبوی، ترک دنیا اور مولوی صاحب کے حلوے مانڈے میں کیا رشتہ ہے؟ دن تو اڑ جاتے ہیں یہ سب کالے پر والے بگلے ہیں جو ہنستے کھیلتے لمحوں کو اپنے پنکھوں میں موند کے آنکھوں سے اوجھل ہو جاتے ہیں راحت جیسے خواب ہے ایسے انسانوں کا جن کی امیدوں کے دامن میں پیوند لگے ہیں جامہ ایک طرف سیتے ہیں دوسری جانب پھٹ جاتا ہے یہ دنیا لمحہ لمحہ جیتی ہے مریمؔ اب کپڑے سیتی ہے آنکھوں کی بینائی ساتھ نہیں دیتی اب اور غضنفرؔ جو رومال میں لڈو باندھ کے اس کے گھر میں پھینکا کرتا تھا اور اس کی آنکھوں کی توصیف میں غزلیں لکھوا کر لایا کرتا تھا اس نے اور کہیں شادی کر لی ہے اب اپنی لکڑی کی ٹال پہ بیٹھا اپنی کج رائی اور جوانی کے قصے دہرایا کرتا ہے ٹال سے اٹھ کر جب گھر میں آتا ہے بیٹی پر قدغن رکھتا ہے نئے زمانے کی اولاد اب ویسی نہیں رہ گئی بدکاری بڑھتی جاتی ہے جو دن بیت گئے کتنے اچھے تھے! برگد کے نیچے بیٹھو یا سولی چڑھ جاؤ بھینسے لڑنے سے باز نہیں آئیں گے موت سے ہم نے ایک تعاون کر رکھا ہے سڑکوں پر سے ہر لمحہ اک میت جاتی ہے پس منظر میں کیا ہوتا ہے نظر کہاں جاتی ہے سامنے جو کچھ ہے رنگوں آوازوں چہروں کا میلا ہے! کرگل اڑ کر وہ پلکھن پر جا بیٹھی پیپل میں طوطے نے بچے دے رکھے ہیں گلدم جو پکڑی تھی کل بے چاری مر گئی نجمہؔ کے بیلے میں کتنی کلیاں آئیں ہیں پھولوں کی خوشبو سے کیا کیا یاد آتا ہے یہ جب کا قصہ ہے سڑکوں پر نئی نئی بجلی آئی تھی اور مجھے سینے میں دل ہونے کا احساس ہوا تھا عید کے دن ہم نے لٹھے کی شلواریں سلوائی تھیں اور سویوں کا زردہ ہمسائے میں بھجوایا تھا سب نیچے بیٹھک میں بیٹھے تھے میں اوپر کے کمرے میں بیٹھا کھڑکی سے زینبؔ کے گھر میں پھولوں کے گچھے پھینک رہا تھا کل زینبؔ کا گھر نیلام ہو رہا ہے سرکاری تحویل میں تھا اک مدت سے! شاید پت جھڑ کا موسم آ پہنچا پتوں کے گرنے کی آواز مسلسل آتی ہے چیچک کا ٹیکہ بیماری کو روکے رکھتا ہے ضبط تولید اسقاط وغیرہ انسانی آبادی کو بڑھنے سے روکیں گے بندر نے جب سے دو ٹانگوں پر چلنا سیکھا اس کے ذہن نے حرکت میں آنا سیکھا ہے پتوں کے گرنے کی آواز مسلسل آتی ہے سڑکوں پر روز نئے چہرے ملتے ہیں موت سے ہم نے ایک تعاون کر رکھا ہے پس منظر میں نظر کہاں جاتی ہے پھولوں کی خوشبو سے کیا کیا یاد آتا ہے چوک میں جس دن پھول پڑے سڑتے تھے خونی دروازے پر شہزادوں کی پھانسی کا اعلان ہوا تھا یہ دنیا لمحہ لمحہ جیتی ہے دلی کی گلیاں ویسی ہی آباد شاد ہیں سب دن تو کالے پر والے بگلے ہیں جو سب لمحوں کو اپنے پنکھوں میں موند کے آنکھوں سے اوجھل ہو جاتے ہیں چاروں جانب رنگ رنگ کے جھنڈے اڑتے ہیں سب کی جیبوں میں انسانوں کے دکھ درد کا درماں خوشیوں کا نسخہ بندھا پڑا ہے لیکن ایسا کیوں ہے جب نسخہ کھلتا ہے 1857 جاتا ہے 1947 آ جاتا ہے
English rendering
Jab din dhal jaata hai, suraj dharti ki oat mein ho jaata hai Aur bhadon ke chatte jaisi bhan bhan Bazaaron ki garmi, afra tafri Motor, bus, barqi relon ka hangama tham jaata hai Chaay khanon naach gharon se kamsin ladke Apne ham-sin mashooqun ko Jin ki jinsi khwahish waqt se pehle jaag uthi hai Le kar ja chukte hain Badhti phailti oonchi Himalaya jaisi taamiron par khamoshi chha jaati hai Theatre tafreehgahon mein taale pad jaate hain Aur bazahir duniya so jaati hai Main apne kamre mein baitha socha karta hoon Kutton ki dum tedhi kyun hoti hai Yeh chitkabri duniya jis ka koi bhi kirdar nahi hai Koi falsafa koi payinda aqdaar nahi, mayaar nahi hai Is par ahl-e-daanish-o-dawaan, falsafi Moti moti adq kitaben kyun likha karte hain? Furqat ki maa ne shauhar ke marne par kitna kohram machaya tha Lekin iddat ke din poore hone se ek hafta pehle Neelam ke mamuon ke saath Badayun ja pahunchi thi Bi bi ki sahank, konde, fateha khwani Jang-e-Siffeen, Jamal aur Badr ke qisson Seerat-e-Nabvi, tark-e-duniya aur Maulvi Sahab ke halwe maandey mein kya rishta hai? Din to ud jaate hain Yeh sab kaale par wale bagule hain Jo hanste khelte lamhon ko Apne pankhon mein moond ke aankhon se ojhal ho jaate hain Rahat jaise khwab hai aise insaanon ka Jin ki ummeedon ke daaman mein paiwand lage hain Jama ek taraf seete hain doosri jaanib phat jaata hai Yeh duniya lamha lamha jeeti hai Maryam ab kapde seeti hai Aankhon ki beenayi saath nahi deti ab Aur Ghazanafar Jo roomal mein laddu baandh ke us ke ghar mein phenka karta tha Aur us ki aankhon ki tauseef mein ghazlein likhwa kar laaya karta tha Us ne aur kahin shadi kar li hai Ab apni lakdi ki taal pe baitha Apni kaj-raai aur jawani ke qisse dohraya karta hai Taal se uth kar jab ghar mein aata hai Beti par qadghan rakhta hai Naye zamane ki aulaad ab waisi nahi reh gayi Badkaari badhti jaati hai Jo din beet gaye kitne acche thhe! Bargad ke neeche baitho ya sooli chadh jaao Bhainse ladne se baaz nahi aayenge Maut se hum ne ek taawun kar rakha hai Sadkon par se har lamha ek mayyat jaati hai Pas-e-manzar mein kya hota hai nazar kahan jaati hai Saamne jo kuch hai rangon aawazon chehron ka mela hai! Kargil ud kar woh palkhan par ja baithi Peepal mein tote ne bacche de rakhe hain Guldum jo pakdi thi kal bechari mar gayi Najma ke bele mein kitni kaliyan aayi hain Phoolon ki khushboo se kya kya yaad aata hai Yeh jab ka qissa hai sadkon par nayi nayi bijli aayi thi Aur mujhe seene mein dil hone ka ehsaas hua tha Eid ke din hum ne latthe ki shalwarein silwayi thin Aur sawayyon ka zarda hamsaye mein bhijwaya tha Sab neeche baithak mein baithe thhe Main oopar ke kamre mein baitha Khidki se Zainab ke ghar mein phoolon ke gucchoon phenk raha tha Kal Zainab ka ghar neelaam ho raha hai Sarkari tehveel mein tha ek muddat se! Shayad pat jhad ka mausam aa pahuncha Patton ke girne ki aawaz musalsal aati hai Chechak ka teeka beemari ko roke rakhta hai Zabt-e-tauleed isqaat wagaira Insani abadi ko badhne se rokenge Bandar ne jab se do taangon par chalna seekha Us ke zehn ne harkat mein aana seekha hai Patton ke girne ki aawaz musalsal aati hai Sadkon par roz naye chehre milte hain Maut se hum ne ek taawun kar rakha hai Pas-e-manzar mein nazar kahan jaati hai Phoolon ki khushboo se kya kya yaad aata hai Chauk mein jis din phool pade sadte thhe Khooni darwaze par shehzadon ki phansi ka elaan hua tha Yeh duniya lamha lamha jeeti hai Dilli ki galiyan waisi hi abaad shad hain sab Din to kaale par wale bagule hain Jo sab lamhon ko Apne pankhon mein moond ke aankhon se ojhal ho jaate hain Chaaron jaanib rang rang ke jhande udte hain Sab ki jaibon mein insaanon ke dukh dard ka darmaan Khushiyon ka nuskha bandha pada hai Lekin aisa kyun hai Jab nuskha khulta hai 1857 jaata hai 1947 aa jaata hai