یادیں
لو وہ چاہ شب سے نکلا پچھلے پہر پیلا مہتاب ذہن نے کھولی رکتے رکتے ماضی کی پارینہ کتاب یادوں کے بے معنی دفتر خوابوں کے افسردہ شہاب سب کے سب خاموش زباں سے کہتے ہیں اے خانہ خراب گزری بات صدی یا پل ہو گزری بات ہے نقش بر آب یہ روداد ہے اپنے سفر کی اس آباد خرابے میں دیکھو ہم نے کیسے بسر کی اس آباد خرابے میں شہر تمنا کے مرکز میں لگا ہوا ہے میلا سا کھیل کھلونوں کا ہر سو ہے اک رنگیں گل زار کھلا وہ اک بالک جس کو گھر سے اک درہم بھی نہیں ملا میلے کی سج دھج میں کھو کر باپ کی انگلی چھوڑ گیا ہوش آیا تو خود کو تنہا پا کے بہت حیران ہوا بھیڑ میں راہ ملی نہیں گھر کی اس آباد خرابے میں دیکھو ہم نے کیسے بسر کی اس آباد خرابے میں وہ بالک ہے آج بھی حیراں میلہ جوں کا توں ہے لگا حیراں ہے بازار میں چپ چپ کیا کیا بکتا ہے سودا کہیں شرافت کہیں نجابت کہیں محبت کہیں وفا آل اولاد کہیں بکتی ہے کہیں بزرگ اور کہیں خدا ہم نے اس احمق کو آخر اسی تذبذب میں چھوڑا اور نکالی راہ مفر کی اس آباد خرابے میں دیکھو ہم نے کیسے بسر کی اس آباد خرابے میں ہونٹ تبسم کے عادی ہیں ورنہ روح میں زہر آگیں گھپے ہوئے ہیں اتنے نشتر جن کی کوئی تعداد نہیں کتنی بار ہوئی ہے ہم پر تنگ یہ پھیلی ہوئی زمیں جس پر ناز ہے ہم کو اتنا جھکی ہے اکثر وہی جبیں کبھی کوئی سفلہ ہے آقا کبھی کوئی ابلہ فرزیں بیچی لاج بھی اپنے ہنر کی اس آباد خرابے میں دیکھو ہم نے کیسے بسر کی آباد خرابے میں کالے کوس غم الفت کے اور میں نان شبینہ جو کبھی چمن زاروں میں الجھا اور کبھی گندم کی بو ناقۂ مشک تتاری بن کر لیے پھری مجھ کو ہر سو یہی حیات صاعقہ فطرت بنی تعطل کبھی نمو کبھی کیا رم عشق سے ایسے جیسے کوئی وحشی آہو اور کبھی مر مر کے سحر کی اس آباد خرابے میں دیکھو ہم کیسے بسر کی اس آباد خرابے میں کبھی غنیم جور و ستم کے ہاتھوں کھائی ایسی مات ارض الم میں خوار ہوئے ہم بگڑے رہے برسوں حالات اور کبھی جب دن نکلا تو بیت گئے جگ ہوئی نہ رات ہر سو مہ وش سادہ قاتل لطف و عنایت کی سوغات شبنم ایسی ٹھنڈی نگاہیں پھولوں کی مہکار سی بات جوں توں یہ منزل بھی سر کی اس آباد خرابے میں دیکھو ہم نے کیسے بسر کی اس آباد خرابے میں راہ نورد شوق کو رہ میں کیسے کیسے یار ملے ابر بہاراں عکس نگاراں خال رخ دلدار ملے کچھ بالکل مٹی کے مادھو کچھ خنجر کی دھار ملے کچھ منجدھار میں کچھ ساحل پر کچھ دریا کے پار ملے ہم سب سے ہر حال میں لیکن یوں ہی ہاتھ پسار ملے صرف ان کی خوبی پہ نظر کی اس آباد خرابے میں دیکھو ہم نے کیسے بسر کی اس آباد خرابے میں ساری ہے بے ربط کہانی دھندلے دھندلے ہیں اوراق کہاں ہیں وہ سب جن سے جب تھی پل بھر کی دوری بھی شاق کہیں کوئی ناسور نہیں گو حائل ہے برسوں کا فراق کرم فراموشی نے دیکھو چاٹ لیے کتنے میثاق وہ بھی ہم کو رو بیٹھے ہیں چلو ہوا قرضہ بے باق کھلی تو آخر بات اثر کی اس آباد خرابے میں دیکھو ہم نے کیسے بسر کی اس آباد خرابے میں خواب تھے اک دن اوج زمیں سے کاہکشاں کو چھو لیں گے کھلیں گے گل رنگ شفق سے قوس قزح میں جھولیں گے باد بہاری بن کے چلیں گے سرسوں بن کر پھولیں گے خوشیوں کے رنگیں جھرمٹ میں رنج و محن سب بھولیں گے داغ گل و غنچہ کے بدلے مہکی ہوئی خوشبو لیں گے ملی خلش پر زخم جگر کی اس آباد خرابے میں دیکھو ہم نے کیسے بسر کی اس آباد خرابے میں خوار ہوئے دمڑی کے پیچھے اور کبھی جھولی بھر مال ایسے چھوڑ کے اٹھے جیسے چھوا تو کر دے گا کنگال سیانے بن کر بات بگاڑی ٹھیک پڑی سادہ سی چال چھانا دشت محبت کتنا آبلہ پا مجنوں کی مثال کبھی سکندر کبھی قلندر کبھی بگولہ کبھی خیال سوانگ رچائے اور گزر کی اس آباد خرابے میں دیکھو ہم نے کیسے بسر کی اس آباد خرابے میں زیست خدا جانے ہے کیا شے بھوک تجسس اشک فرار پھول سے بچے زہرہ جبینیں مرد مجسم باغ و بہار مرجھا جاتے ہیں اکثر کیوں کون ہے وہ جس نے بیمار کیا ہے روح ارض کو آخر اور یہ زہریلے افکار کس مٹی سے اگتے ہیں سب جینا کیوں ہے اک بیگار ان باتوں سے قطع نظر کی اس آباد خرابے میں دیکھو ہم نے کیسے بسر کی آباد خرابے میں دور کہیں وہ کوئل کوکی رات کے سناٹے میں دور کچی زمیں پر بکھرا ہوگا مہکا مہکا آم کا بور بار مشقت کم کرنے کو کھلیانوں میں کام سے چور کم سن لڑکے گاتے ہوں گے لو دیکھو وہ صبح کا نور چاہ شب سے پھوٹ کے نکلا میں مغموم کبھی مسرور سوچ رہا ہوں ادھر ادھر کی اس آباد خرابے میں دیکھو ہم نے کیسے بسر کی اس آباد خرابے میں نیند سے اب بھی دور ہیں آنکھیں گو کہ رہیں شب بھر بے خواب یادوں کے بے معنی دفتر خوابوں کے افسردہ شہاب سب کے سب خاموش زباں سے کہتے ہیں اے خانہ خراب گزری بات صدی یا پل ہو گزری بات ہے نقش بر آب مستقبل کی سوچ، اٹھا یہ ماضی کی پارینہ کتاب منزل ہے یہ ہوش و خبر کی اس آباد خرابے میں دیکھو ہم نے کیسے بسر کی اس آباد خرابے میں
English rendering
Lo wo chaah-e-shab se nikla pichle pehar peela mehtaab Zehen ne kholi rukte rukte maazi ki pareena kitab Yaadon ke be-ma'ani daftar khwabon ke afsurda shahab Sab ke sab khamosh zubaan se kehte hain aye khana kharab Guzri baat sadi ya pal ho guzri baat hai naqsh bar aab Yeh rudaad hai apne safar ki is aabaad kharaabe mein Dekho hum ne kaise basar ki is aabaad kharaabe mein Shahar-e-tamanna ke markaz mein laga hua hai mela sa Khel khilaunon ka har soo hai ek rangeen gulzaar khula Wo ek balak jis ko ghar se ek dirham bhi nahin mila Mele ki saj dhaj mein kho kar baap ki ungli chhod gaya Hosh aaya to khud ko tanha pa ke bohat hairan hua Bheed mein raah mili nahin ghar ki is aabaad kharaabe mein Dekho hum ne kaise basar ki is aabaad kharaabe mein Wo balak hai aaj bhi hairan mela jyon ka tyon hai laga Hairan hai bazaar mein chup chup kya kya bikta hai sauda Kahin sharafat kahin najaabat kahin mohabbat kahin wafa Aal aulaad kahin bikti hai kahin buzurg aur kahin khuda Hum ne is ahmaq ko aakhir isi tazabzub mein chhoda Aur nikali raah-e-mafar ki is aabaad kharaabe mein Dekho hum ne kaise basar ki is aabaad kharaabe mein Honth tabassum ke aadi hain warna rooh mein zehr aa gayin Ghuppe hue hain itne nashtar jin ki koi ta'daad nahin Kitni baar hui hai hum par tang yeh phaili hui zameen Jis par naaz hai hum ko itna jhuki hai aksar wahi jabeen Kabhi koi sufla hai aaqaa kabhi koi abla farzeen Bechi laaj bhi apne hunar ki is aabaad kharaabe mein Dekho hum ne kaise basar ki aabaad kharaabe mein Kaale kos gham-e-ulfat ke aur main naan-e-shabeena jo Kabhi chaman-zaron mein uljha aur kabhi gandum ki bo Naqa-e-mushk-e-tattari ban kar liye phiri mujh ko har soo Yehi hayaat-e-sa'iqa-fitrat bani ta'attul kabhi namu Kabhi kiya ram-e-ishq se aise jaise koi wahshi aahoo Aur kabhi mar mar ke sahar ki is aabaad kharaabe mein Dekho hum kaise basar ki is aabaad kharaabe mein Kabhi ghaneem-e-jaur-o-sitam ke hathon khai aisi maat Arz-e-alam mein khwar hue hum bigde rahe barson halaat Aur kabhi jab din nikla to beet gaye jag hui na raat Har soo mah-wash sada qaatil lutf-o-inaayat ki saughaat Shabnam aisi thandi nigahein phoolon ki mehkaar si baat Jyon ton yeh manzil bhi sar ki is aabaad kharaabe mein Dekho hum ne kaise basar ki is aabaad kharaabe mein Raah-naward-e-shauq ko rah mein kaise kaise yaar mile Abr-e-baharaan aks-e-nigaran khaal-e-rukh-e-dildar mile Kuch bilkul mitti ke maadho kuch khanjar ki dhaar mile Kuch manjhdhaar mein kuch sahil par kuch dariya ke paar mile Hum sab se har haal mein lekin yoon hi haath pasaar mile Sirf un ki khoobi pe nazar ki is aabaad kharaabe mein Dekho hum ne kaise basar ki is aabaad kharaabe mein Saari hai be-rabt kahani dhundle dhundle hain auraaq Kahan hain wo sab jin se jab thi pal bhar ki doori bhi shaaq Kahin koi naasoor nahin go ha'il hai barson ka firaaq Karam-faramoshi ne dekho chaat liye kitne meesaq Wo bhi hum ko ro baithe hain chalo hua qarz-e-be-baaq Khuli to aakhir baat asar ki is aabaad kharaabe mein Dekho hum ne kaise basar ki is aabaad kharaabe mein Khwab the ek din auj-e-zameen se kahkashaan ko chhoo lenge Khulenge gul rang shafaq se qaus-e-qazah mein jhooleinge Baad-e-bahari ban ke chaleinge sarson ban kar phooleinge Khushiyon ke rangeen jhurmat mein ranj-o-mehn sab bhooleinge Daagh-e-gul-o-ghuncha ke badle mehki hui khushboo lenge Mili khalish par zakhm-e-jigar ki is aabaad kharaabe mein Dekho hum ne kaise basar ki is aabaad kharaabe mein Khwar hue damri ke peeche aur kabhi jholi bhar maal Aise chhod ke uthe jaise chhupa to kar dega kangal Sayaane ban kar baat bigadi theek padi saada si chaal Chhaana dasht-e-mohabbat kitna aabla pa Majnun ki misaal Kabhi Sikandar kabhi Qalandar kabhi bagoola kabhi khayal Swaang rachaaye aur guzar ki is aabaad kharaabe mein Dekho hum ne kaise basar ki is aabaad kharaabe mein Zeest khuda jaane hai kya shai bhook tajassus ashk-e-faraar Phool se bache zehra jabeenein mard-e-mujassam baagh-o-bahaar Murjha jaate hain aksar kyun kaun hai wo jis ne beemaar Kiya hai rooh-e-arz ko aakhir aur yeh zehreele afkaar Kis mitti se ugte hain sab jeena kyun hai ek begaar In baton se qata-e-nazar ki is aabaad kharaabe mein Dekho hum ne kaise basar ki aabaad kharaabe mein Dur kahin wo koel kooki raat ke sannate mein dur Kachhi zameen par bikhra hoga mehka mehka aam ka boor Baar-e-mashaqqat kam karne ko khaliyanon mein kaam se choor Kam sin ladke gaate honge lo dekho wo subh ka noor Chaah-e-shab se phoot ke nikla main maghmoom kabhi masroor Soch raha hoon idhar udhar ki is aabaad kharaabe mein Dekho hum ne kaise basar ki is aabaad kharaabe mein Neend se ab bhi dur hain aankhein go ke rahein shab bhar be-khwab Yaadon ke be-ma'ani daftar khwabon ke afsurda shahab Sab ke sab khamosh zubaan se kehte hain aye khana kharab Guzri baat sadi ya pal ho guzri baat hai naqsh bar aab Mustaqbil ki soch, utha yeh maazi ki pareena kitab Manzil hai yeh hosh-o-khabar ki is aabaad kharaabe mein Dekho hum ne kaise basar ki is aabaad kharaabe mein