یہ سب ظہورِ شانِ حقیقت بشر میں ہے
یہ سب ظہورِ شانِ حقیقت بشر میں ہے جو کچھ نہاں تھا تخم میں، پیدا شجر میں ہے ہر دم جو خونِ تازہ مری چشمِ تر میں ہے ناسور دل میں ہے کہ الٰہی جگر میں ہے کھٹکا رقیب کا نہیں، آغوش میں ہے یار اس پر بھی اک کھٹک سی ہمارے جگر میں ہے واصل سمجھیے اس کو جو سالک ہے عشق میں منزل پہ جانیے اسے جو رہگزر میں ہے آنکھوں کے نیچے پھِرتی ہے تصویر یار کی پُتلی سی اک بندھی ہوئی تارِ نظر میں ہے کرتے ہیں اس طریق سے طے ہم رہِ سلوک سر اس کے آستاں پہ، قدم رہگزر میں ہے پہلو میں میرے دل کو نہ، اے درد! کر تلاش مدت ہوئی تباہی کا مارا سفر میں ہے تُلسی کی کیا بہار ہے دندانِ یار پر سوسن کا پھول چشمۂ آبِ گہر میں ہے ہو دردِ عشق ایک جگہ تو دوا کروں دل میں، جگر میں، سینے میں، پہلو میں، سر میں ہے صیّاد سے سوال رہائی کا کیا کروں اُڑنے کا حوصلہ ہی نہیں بال و پر میں ہے قاصد کو ہاتھ داغ کے بھیجا ہے یار نے خاکی نئی رسید کفِ نامہ بر میں ہے تیرِ قضا کو ناز ہے کیا اپنے توڑ پر اتنا اثر تو یار کی سیدھی نظر میں ہے تم جاؤ تیغ باندھ کے پھر سیر دیکھ لو میرے گلے پہ ہے کہ تمھاری کمر میں ہے ساقی مئے طہور میں کیفیّتیں سہی پر وہ مزا کہاں ہے جو تیری نظر میں ہے خنجر چلے کسی پہ تڑپتے ہیں ہم امیر سارے جہاں کا درد ہمارے جگر میں ہے
English rendering
Yeh sab zahoor-e-shaan-e-haqeeqat bashar mein hai Jo kuch nihaan tha tukhm mein, paida shajar mein hai Har dam jo khoon-e-taza meri chashm-e-tar mein hai Nasoor dil mein hai ke Ilahi jigar mein hai Khatka raqeeb ka nahin, aaghosh mein hai yaar Is par bhi ek khatak si hamare jigar mein hai Waasil samjhiye us ko jo saalik hai ishq mein Manzil pe jaaniye use jo rahguzar mein hai Aankhon ke neeche phirti hai tasveer-e-yaar ki Putli si ek bandhi hui taar-e-nazar mein hai Karte hain is tareeq se tai hum rah-e-sulook Sar us ke aastaan pe, qadam rahguzar mein hai Pehlu mein mere dil ko na, ae dard! kar talaash Muddat hui tabahi ka mara safar mein hai Tulsi ki kya bahar hai dandan-e-yaar par Sausan ka phool chashma-e-aab-e-gauhar mein hai Ho dard-e-ishq ek jagah to dawa karoon Dil mein, jigar mein, seene mein, pehlu mein, sar mein hai Sayyad se sawal rihai ka kya karoon Udne ka hausla hi nahin baal-o-par mein hai Qasid ko haath dagh ke bheja hai yaar ne Khaki nayi raseed kaf-e-nama-bar mein hai Teer-e-qaza ko naaz hai kya apne tod par Itna asar to yaar ki seedhi nazar mein hai Tum jao tegh baandh ke phir sair dekh lo Mere gale pe hai ke tumhari kamar mein hai Saqi mai-e-tahoor mein kaifiyyatein sahi Par woh maza kahan hai jo teri nazar mein hai Khanjar chale kisi pe tadapte hain hum Ameer Saare jahan ka dard hamare jigar mein hai